iklan

EKONOMIA, INTERNASIONÁL, BOBONARO, HEADLINE, MUNISÍPIU, POLÍTIKA

Prezidente Repúblika husu Governu konsidera zona fronteira iha Programa no OJE

Prezidente Repúblika husu Governu konsidera zona fronteira iha Programa no OJE

Prezidente Repúblika, José Ramos-Horta. Imajen Tatoli/Francisco Sony

MALIANA, 12 jullu 2023 (TATOLI) – Prezidente Repúblika, José Manuel Ramos Horta, husu IX Governu Konstitusionál atu fó prioridade ba zona fronteira iha Programa Governu no Orsamentu Jerál Estadu (OJE) kada tinan, tanba durante tinan 20 populasaun zona fronteira halerik ba kondisaun estrada no nesesidade bázika sira seluk.

Ramos Horta informa ona ba Primeiru Ministru atu fó prioridade ba dezenvolvimentu iha zona fronteira, hahú hosi Mota-Masin, munisípiu Covalima to’o Mota-Ain, munisípiu Bobonaro nune’e bele hadi’ak ekonomia povu nian.

Xefe estadu afirma, Governu presiza halo investimentu ba zona fronteira tanba tinan 20 ona governu troka ba mai hela de’it, maibé seidauk tau atensaun másimu ba zona fronteira iha munisípiu rua ne’e.

“Estrada iha fronteira ne’e, iha Fatululik, Fatumea, Fohorem la tau atensaun, la tau atensaun ba ema-nia moris, ha’u mak primeiru-ministru, ha’u mak kaer governu karik ha’u hatete, Zona fronteira tenke tau investimentu boot, labele tau de’it iha Oe-Cuse, haluha tiha fronteira Suai to’o Mota-Ain,” Prezidente Repúblika ko’alia iha suku Tapo-Memo, postu administrativu Maliana, kuarta ne’e.

Iha parte seluk, Xefe Estadu fó-sai katak durante ne’e Xanana Gusmao mak halo negosiasaun ba fronteira  marítima ho Austrália ne’ebé konsege rezolve ona ho susesu boot mai  Timor-Leste.

Tanba ne’e xefe estadu kontinua fó konfiansa ba Xanana Gusmão ho líder indonézia atu rezolve disputa fronteira terrestre tanba agora iha hela faze finalizasaun.

Notísia relevante: Negosiasaun Fronteira Terrestre TL-RI Sei Sai Ezemplár Ba Mundu

“Ha’u fiar iha tempu badak sei rezolve fronteira terrestre, maun Xanana mak kontinua kaer ida-ne’e no depois kontinua hakat ba fronteira marítima ho Indonézia, ne’e hanesan prioridade ke primeiru ministru deklara, ke ha’u mós hatete ne’e duni, prioridade absoluta atu ita to’o 2027 situasaun fronteira marítima, terrestre Timor nia ho rai seluk remata 100%,” nia katak.

Entretantu, Xefe Negosiadór Prinsipál, Xanana Gusmão, antes ne’e hasoru malu ona ho Ministru Koordenadór ba Asuntu Polítika no Defeza Indonézia, Wiranto no Ministru Negósiu Estranjeiru no Kooperasaun Repúblika Indonézia, Retno Marsudi, ne’ebé iha nota prinsípiu aseitasaun ba finalizasaun fronteira terrestre.

Liuhosi asinatura aseitasaun ne’e finaliza ona fronteira terrestre iha segimentu rua hanesan Noelbesi-Citrana no Bijael Sunan-Oben.

Área Fronteira Noelbesi Citrana hanesan fronteira entre Kupang, Nusa Tenggara Timur (NTT) no Ambeno (Oé-cusse) ne’ebé hanesan área hosi Timor-Leste. Área Fronteira Noelbesi Citrana hanesan fronteira entre Kupang, Nusa Tenggara Timur (NTT) no Ambeno (Oé-cusse) ne’ebé hanesan área husi Timor-Leste.

Notísia relevante: Xanana: diskusaun fronteira terestre entre TL-Indonézia seidauk finaliza

Jornalista: Sérgio da Cruz

Editór: Evaristo Soares Martins

iklan
iklan

Leave a Reply

iklan
error: Content is protected !!