Autoridade Covalima promete sei fó apoiu emejénsia ba vítima dezastre iha Labarai
COVALIMA, 13 jullu 2023 (TATOLI)–Autoridade Covalima liuhosi Servisu Munisipál Protesaun Sivil Jestasaun Risku Dezastre naturál promete sei fó apoiu emejénsia ba vítima dezastre naturál iha suku Labarai, postu Suai, munisípiu Covalima.
“Ita simu ona relatóriu hosi xefe suku Labarai no ekipa halo lavanatamentu dadus iha terreñu ita ko’alia apoiu emerjénsia iha hela maibé tenke ajusta dadus ne’ebé iha nune’e fó apoiu emerjénsia dala ida, nune’e semana oin ita sei fó apoiu emerjénsia,” Diretór Servisu Munisipál Protesaun Sivíl Jestasaun Risku Dezastre Naturál Covalima, Quintino da Costa, hateten ba Agência Tatoli, iha-nia servisu fatin, Bairru Costa, kinta ne’e.
Nia rekoñese durante ne’e seidauk fó apoiu emerjénsia ba vítima dezastre naturál iha Labarai maibé nia promete iha semana ne’e sei fó apoiu emejénsia ba vítima dezastre naturál sira-ne’ebé seidauk hetan apoiu emejénsia hosi autoridade Covalima.
“Ita-nia ekipa halo ona lavantamentu dadus hafoin simu dadus hosi xefe suku no ekipa sei halo observasaun direta iha terreñu nune’e sei ajusta dadus iha sistema baze dadus foin bele fó apoiu emerjénsia,” nia dehan.
Tuir dadus ne’ebé Servisu Munisipal Protesaun Sivil Jestasaun Risku Dezastre naturál simu hosi xefe suku Labarai katak, iha suku Labarai uma haat hetan estragu hosi dezastre naturál no estraga xefe família 20 nia plantasaun.
Antes ne’e, Vítima Dezastre naturál Aleixo Perreira Carvalho hateten udan boot ne’ebé akontese iha loron 3-4 fulan jullu tinan 2023 ne’e, rezulta bee-mota Rai Keta lori sasurut nia uma maibé seidauk hetan apoiu emerjénsia hosi autoridade covalima.
Jornalista : Celestina Teles
Editór : Cancio Ximenes
