IX Governu Konstitusionál submete ona programa ba PN
DILI, 13 jullu 2023 (TATOLI)—Vise Ministru Asuntu Parlamentár, Adérito Hugo da Costa, kinta ne’e, iha tuku 14h30 entrega ona programa IX Governu Konstituisional ba iha Parlamentu Nasionál (PN).
Notísia Relevante: Programa IX Governu kompoin área prinsipál neen
Programa IX Governu ne’e entrega direta hosi Vise Ministru Asuntu Parlamentár, Adérito Hugo, ba Prezidente Parlamentu Nasionál, Maria Fernanda Lay, iha nia gabinete PN.
Vise Ministru, Adérito Hugo, hateten IX Governu Konstituisionál hola pose iha 01 jullu liu ba, tuir konstituisaun artigu 108 no 109 Governu iha tempu loron 30 depois pose atu submete programa.
“Haree ba sirkunstánsia oioin nesesidade Governu entrada rapidamente iha ninia atividade, entaun halo serbisu ho imediata para prepara aprovasaun ba IX Governu nia programa. Entaun, desde 03 jullu to’o horisehik IX Governu konsege halo aprovasaun programa IX Governu Konstituisional no ohin lorokraik ami iha biban submete mai Parlamentu Nasionál no entrega ba Prezidente Parlamentu,” Vise Ministru Asuntu Parlamentár, Adérito Hugo da Costa, hateten hafoin entrega programa IX Governu refere.
Nia esplika, dokumentu programa IX Governu ninian ne’e iha pájina 160 ne’ebé kompostu hosi reafirmasaun Estadu direitu demokrátiku, kontinuasaun dezenvolvimentu kapital sosiál, dezenvolvimentu infraestrutura, dezenvolvimentu ekonómiku, konsolidasaun governativa no ikus liu kontinuasaun polítika boa-governasaun no kombate korrupsaun.
“Hafoin entrega hanesan responsabilidade Parlamentu nian ami aguarda desizaun hosi Parlamentu Nasionál liuhosi konferénsia lidér bankada para ajenda hodi halo debate,” nia dehan.
Tuir konstituisaun, nia hateten, debate ba programa ne’e la liu loron lima, entaun desizaun loron hira depende ba desizaun iha konferénsia lidér bankada, ne’ebé ohin Prezidente Parlamentu Nasionál konfirma ona sei hala’o hela konvokatóriu iha sesta 14 jullu mak foin hatene ajenda halo debate hahú bainhira.
Notísia Relevante: PM Xanana: “Loron 120 sei anula lei kria munisípiu Ataúro-konsolida pás”
Jornalista : Nelson de Sousa
Editór : Cancio Ximenes
