DILI, 13 jullu 2023 (TATOLI)—Diretora Programa Monitorizasaun Sistema Judisiál (JSMP, sigla inglés), Ana Paula Marçal, hateten JSMP hato’o paresér ba Prezidente Parlamentu Nasionál, Maria Fernanda Lay, atu fó prioridade iha lejislatura daneen ne’e oinsá altera kódigu sivíl hodi fó rekoñesimentu kazamentu ba relijiaun seluk.
Notísia Relevante: Komunidade Musulmanu labele hetan sertidaun kazamentu tanba lei la fó dalan
“Ami entrega ami-nia paresér liuliu artigu 1435 kona-ba rekoñesimentu kazamentu nian, tanba agora daudaun ita hatene kódigu sivil rekoñese de’it kazamentu katóliku, maibé la rekoñese relijiaun sira seluk ne’ebé impaktu ba relijiaun sira seluk ne’ebé iha dezáfiu bainhira atu hetan sertifaun kazamentu,” Diretora JSMP ne’e hateten ba jornalista sira hafoin ramata enkontru ho Prezidente Parlamentu Nasionál, iha PN, kinta ne’e.
Nia dehan, ida-ne’e mak paresér JSMP nian hein katak Prezidente PN bele baixa ba komisaun sira-ne’ebé trata asuntu ne’e hodi haree.
Nia agradese tanba iha VIII Governu KOnstitusionál liuba liuhosi Ministéiru Justisa iha esbosu lei ida-ne’ebé kona-ba rekoñesimentu no liberdade ba relijiaun, inisiativa ne’e di’ak nune’e JSMP tenke apoiu liután tanba kódigu sivíl nian tenke halo hanesan bainhira iha ona rekoñesimentu bele halo estrutura ne’ebé di’ak, hodi armónia entre dekretu-lei ne’e no kódigu sivil.
“Ami-nia observasaun no durante ne’e halo advokásia no hamutuk líder relijiozu sira hosi islámiku, protestante ho relijiaun sira seluk ne’ebé ladún hetan benefisia ba lei ida-ne’e, sira lamenta tebes hato’o sira-nia difikuldade iha Dili no munisípiu,” nia dehan.
Tanba, nia dehan, sira mós sidadaun Timor-Leste ne’eb’e presiza hetan tratamentu ida labele iha diskriminasaun, tanba iha direitu umanu ne’ e ema hotu iha direitu fundamentál atu hili relijiaun maibé rekoñese de’it parte balun.
Notísia Relevante: Igreja protestante preokupa prosesu tratamentu sertidaun kazamentu-RDTL
Jornalista : Nelson de Sousa
Editór : Cancio Ximenes
