SMAS Covalima sei realiza sensibilizasaun violénsia bazeia jéneru ba líder komunitária
COVALIMA, 13 jullu 2023 (TATOLI)–Servisu Munisipál Asaun Sosiál (SMAS) Covalima sei realiza sensiblizasaun kona-ba violénsia bazeia ba jéneru ba líder komunitáriu iha postu administrativu Fatumea, Tilomar, Zumalai no Suai.
“Programa sensibilizasaun violénsia bazeia ba jéneru, ami hala’o ba datoluk ona bazeia ba ami-nia meta, ami sei hala’o programa sensibilizasaun ba dahitu. Nune’e, sei hala’o sensibilizasaun programa violénsia bazeia ba jéneru iha postu sira hanesan, Fatumea, Tilomar, Zumalai no Suai,” Diretór Servisu Munisipál Asaun Sosiál (SMAS), Anacleto do Nascimento, hateten ba Agência Tatoli, iha nia kna’ar fatin, Bairru Costa, kinta ne’e.
Tanba, iha trimestre dahuluk no daruak, SMAS implementa ona programa sensibilizasaun violénsia bazeia ba jéneru iha postu administrativu sira hanesan postu Maucatar no Fohorem ne’ebé partisipa másimu hosi lidér komunitária sira.
“Ami hala’o ona programa sensibilizasaun iha postu administrativu Maucatar no Fohorem kona-ba violénsia bazeia ba jéneru ne’ebé partisipasaun másimu hodi liíer komunitária sira,” nia dehan.
Ho nune’e, SMAS sei kontinua realiza programa sensibilizasaun violénsia bazeia ba jéneru iha postu administrativu Fatumea, Tilomar, Zumalai no Suai kona-ba bainhira mak atu implementa sei orsamentu bainhira iha bele hahú hala’o ona.
Durante realiza programa sensibilizasaun violénsia bazeia ba jéneru hasoru difikuldade hanesan laiha transporte nune’e difikulta atu hala’o servisu ba iha área rurál.
Entertantu, programa prióridade ba tinan fiskál 2023, Servisu Munisipál Asaun Sosiál (SMAS) fó prióridade sira hanesan, fó apoiu estudante difisiénsia hanesan alimentasaun ho non-alimentasaun apoiu kaixaun, apoiu karreta funeráriu, transporta mate-isin no programa sensibilizasaun violénsia bazea ba jéneru.
Jornalista : Celestina Teles
Editór : Cancio Ximenes
