Aldeia haat iha Leber halerik enérjia eltérika
BOBONARO, 14 jullu 2023 (TATOLI) – Abitante aldeia haat, komposta hosi Leber-Taz, Mabelis, Holbese no Holsa-Taz iha suku Leber, postu administrativu Bobonaro, munisípiu Bobonaro, dezde tempu okupasaun Indonézia to’o agora sei kontinua halerik ba enéjia elétrika no estrada.
Xefe suku Leber, Joanico da Silva, hateten durante tinan 20 resin ona Povu iha suku ne’e seidauk sente dezenvolvimentu infraestrutura bázika liuliu eletrisidade, tanba dadaun ne’e sei uza kamí no solar panel.
Notisia relevante: EDTL finaliza ona projetu liña eletrifikasaun komunitária tolu iha Bobonaro
“Totál populasaun la asesu ba eletrisidade ne’e 1,642 no uma-kain 345 mak seidauk asesu, agora sira ne’ebé iha posiblidade, osan oituan bele sosa solár panel, balu ne’ebé osan laiha nia sunu de’it kamí iha tempu kalan,” nia ko’alia Leber, sesta ne’e.
Nune’e mos komunidade preukupa kona-ba estrada ligasaun hosi liña jerál aldeia Bucuk mai iha sentru suku tanba kondisaun grave kuaze kilometru haat resin.
“Ami hato’o ona pedidu ba Ministériu Obra Públika, maibé ate a data dalan ida hosi liga hosi dalan boot mak sede suku komunidade servisu ho liman de’it, maibé intervensaun hosi governu to’o agora,” nia katak.
Abitante aldeia Leber Taz, Prisca Moniz de Jesus, sente triste haree kondisaun estrada refere no husu ba IX Governu atu konsidera problema hirak ne’e iha OGE 2024 tanba durante ne’e suku Leber sei hela nakukun laran.
“Ami sunu de’it kami iha tempu kalan atu oan sira estuda, tanba listrik seidauk tama, depois estrada ne’e mós aat loos, inan-isin rua atu partu leba de’it,” nia hateten.
Antes ne’e Ministériu Saúde konstrui ona sentru saúde iha suku ne’e no hetan ona hosi Ministra saúde sesante, Odete Maria Freitas Belo, maibé to’o agora seidauk koloka pesoál saúde atu fó atendimentu ba komunidade sira.
Notisia relevante: Implementasaun UKL suku rua iha Balibo no Lolotoe atraza
Jornalista: Sergio da Cruz
Editór: Evaristo Soares Martins
