DILI, 16 jullu 2023 (TATOLI)—Sentru Lojístiku Nasionál (CLN, sigla portugés), tinan ne’e, sei sosa hare-kulit tonelada 1.111.
Notísia Relevante: CLN sei sosa hare-kulit tonelada 3000 iha territóriu nasionál
“Tinan ne’e ita sei sosa hare-kulit tonelada 1.111 hosi númeru balu daudaun ne’e ita sosa ona rai iha ba ita-nia armajen sira iha munisípiu,” Diretór Transporte no Lojístiku iha CLN, Tito da Costa, hateten ba Agência Tatoli liuhosi telefónika, domingu ne’e.
Nia hateten, produtu hare-kulit hosi tonelada 1.111 ne’e, balun daudaun ne’e rai ona iha armajen sira hanesan iha Natarbora hare-kulit tonelada 163, Maliana haree-kulit tonelada 466, armajen Maubise hare seidauk tama no Baucau hare-kulit laiha maibé foos mak tonelada 400-resin.
Kona-ba foos, nia dehan, iha armajen tinan kotuk nian sei iha estoke tonelada 1.200, tinan ne’e CLN sosa tan foos-rai (lokál) hamutuk tonelada 560 no agora tau ona iha armajen CLN Tibar.
Tuir nia, protudu seluk hanesan fore-mungu tinan ne’e sei sosa tonelada 330-resin, koto tonelada 340.
Ba kestaun ne’e, konkursu públiku halo hotu ona hein kompañia sira hatama de’it no daudaun ne’e ekipa CLN mós halo hela inspesaun ba produtu sira iha terrenu hodi haree ida-ne’ebé mak tuir kritéria bele hatama no ida-ne’ebé seidauk ne’e prosesa tan lai.
“Orsamentu ne’ebé prevee tinan ne’e atu sosa produtu lokál sira-ne’e hamutuk millaun $3,” nia dehan.
CLN nia armajen sira iha munisípiu mak hanesan iha Maliana-Bobonaro, Baucau, Natarbora Manatuto, Maubisse-Ainaro inkui Dili.
Notísia Relevante: CLN prepara millaun $8 sosa produtu lokál variedade hitu
Jornalista : Arminda Fonseca
Editór : Cancio Ximenes
