BOBONARO, 27 janeiru 2023 (TATOLI)-Sentru Lojístika Nasionál (CLN, sigla portugés) planeia iha époka 2023 ne’e sei sosa hare-kulit tonelada 3000 hosi grupu agrikultórr sira iha territóriu nasionál.
Diretor ezekutivu CLN, Jacinto Paizo, subliña tinan ne’e sei sosa produtu lokál ho variedade hitu, komposta hosi batar, fore-rai, fore-metan, fore-mungu no koto ho totál tonelada kuaze 7000 tanba kada variedade sosa tonelada 150, maibé kuantidade boot liu mak hare-kulit.
Notísia relevante: CLN koordena Agrikultura Oé-Cusse atu prepara produtu lokál variedade neen
“Ita tinan ne’e sei sosa hare-kulit hamutuk tonelada 3000 iha territóriu laran tomak,” Jaicinto Paizo informa ba Jornalista Tatoli, hafoin hamutuk ho parseiru JICA hala’o enkontru ho grupu agrikultór sira iha armazein CLN Maliana, munisípiu Bobonaro, sesta ne’e.
Nia subliña, atu sosa produtu variedade hitu ne’e CLN prepara ona orsamentu millaun $6 hodi responde ba nesesidade governu nian, liuliu ba programa merenda eskolár, distribui ba Ministériu Solidariedade Sosiál (MSSI) hodi apoia ba komunidade.
Nune’e mós inklui halo intervensaun, normaliza presu signifika fa’an fali ba komunidade no empreza balu ne’ebé presiza hodi kontribui reseita ba kofre estadu.
Maibé tuir nia, merkadu ne’ebé boot liu iha futuru mak CLN prepara produtu lokál ba programa subsídiu alimentár ba funsionáriu sira iha territóriu nasionál.
Tanba Polítika no mehi CLN nian mak tenke hatún produtu importasaun hosi rai-li’ur, motiva agrikultórr hasa’e produtu lokál hodi responde ba konsumu nasionál.
“Ninia Konluzaun mak agrikultór sira mak tenke fó-haan ema sira-ne’ebé la serbisu agrikultór, ita sosa atu fó-haan ba funsionariu sira. Ida-ne’e insentiva hodi dudu sira katak, ita-boot sira lalika ta’uk tanba ema-ne’ebé atu konsumu ita-nia produtu ne’e iha,” nia fó hanoin ba grupu agrikultór Maliana.
Notísia relevante: CLN sensibiliza presu produtu lokál ba grupu agrikultór Maliana
Jornalista: Sérgio da Cruz
Editór: Evaristo Soares Martins
