OÉ-CUSSE, 30 setembru 2022 (TATOLI) – Sentru Lojíztika Nasionál (CLN, sigla portugés) sesta ne’e realiza enkontru koordenasaun ho Sekretáriu Rejionál Agrikultura Rejiaun Administrativa Espesiál Oé-Cusse Ambeno (RAEOA) atu asenta dadus produtu lokál hodi prepara variedade neen hodi sosa atu aumenta estoke alimentasaun iha sentru nasionál.
Ekipa delegasaun CLN, lidera hosi asesór Paulo Maia, hatete, objetivu CLN realiza enkontru ho Agrikultura Oé-Cusse diskute atu asenta loloos dadus kona-bá produsaun produtu lokál iha Oé-Cusse, hodi aumenta estoke alimentasaun iha CLN.
“Tanba Governu aprova polítika makro-ekonómika atribui kompeténsia ba CLN variedade neen, hanesan hare, batar, koto, fore-mungu, fore-keli no fore-metan, produtu variedade neen ne’e, maka CLN atu sosa hodi atende fila-fali ba komunidade bainhira presiza hanesan dezastre, no bainhira Estadu tama iha situasaun kalamidade, entaun produtu ne’ebé CLN sosa responde fali ba situasaun sira-ne’e” Paulo Maio, hatete iha Oé-Cusse.
Tan ne’e papél CLN mai iha Diresaun Rejionál Agrikultura, atu deskuti hodi asenta loloos dadus hosi produsaun ba variedade produtu lokál iha Oé-Cusse, nune’e iha 2023 CLN bele orsamenta tuir envelope fiskál ne’ebé maka Ministériu Koordenadór ba Asuntu Ekonómiku (MEKAE) fó, atu tau osan hodi sosa produtu lokál hosi komunidade.
Sekretáriu Rejionál ba Asuntu Agrikultura, José Eta, informa, objetivu hosi enkontru ne’e diskute asuntu rua, primeiru kona-bá intervensaun CLN ba iha merkadu no dadus produsaun alimentasaun iha Oé-Cusse.
“Entaun variedade prioridade neen mak CLN presiza hosi Oé-Cusse, produtu sira-ne’e kuaze iha hotu, maske kuantidade ki’ik maibé ita-bele atende no fornese,” José Eta informa.
José Eta, hatete, kona-bá foos ba iha époka 2021-2022 Oé-Cusse nia produsaun tonelada rihun 17, batar tonelada rihun 10, maibé ba époka 2022-2023 tinan ne’e rezultadu crop-cutting produsaun tún, tanba mudansa klimátika, tanba produsaun ba natar tonelada rihun 10 ho batar to’o de’it tonelada rihun neen.
“Produsaun menus tanba afeta hosi udan-been menus no dalaruma barak-liu, kuandu udan-been barak-liu provoka peste oinoin halo atakasaun ba plantasaun sira-ne’e, entaun afeta ba produsaun menus,” nia katak.
Autoridade ne’e fundamenta, kona-bá variedade seluk hanesan fore no koto, Diresaun Rejionál Agrikultura hamutuk parseiru sira internasionál Word Neihgbor (WN) hamutuk ho perseiru lokál sira seluk, dezde tinan kotuk to’o tinan ne’e hahú dezenvolve daudaun, hodi garante alimentasaun iha Oé-Cusse.
Iha tinan ne’e, Agrikultura Oé-Cusse sei halo advokasia ba natar na’in-sira oinsá utiliza natar hafoin kolleta hare, nune’e bele iha diversifikasaun plantasaun ba área sira-ne’e, nune’e bele intensifika produsaun alimentár iha rejiaun ne’e.
Jornalista : Abílio Elo Nini
Editór : Evaristo Soares Martins
