Autoridade Lacluta husu Governu rezolve ponte tolu
VIQUEQUE, 17 jullu 2023 (TATOLI)–Autoridade postu Lacluta, munisípiu Viqueque husu ba IX Governu atu rezolve ponte tolu hanesan Dilór, Uelolo no Uma-Tolu hodi labele difikulta movimentu transporte no ema.
“Ha’u prefere Governu agora rezolve ona ponte tolu ne’e tanba hetan estragu hahú hosi tinan 2016 to’o agora seidauk rezolve. Kondisaun ponte tolu ne’e la’ós difikulta populasaun Lacluta de’it, maibé mós movimentu sira-ne’ebé atu mai munisípiu Viqueque,” Administradór postu administrativu Lacluta, José Andrade dos Santos, hateten iha postu Lacluta, segunda ne’e.
Antes ne’e, Autoridade postu aprezenta ona preokupasaun ne’e ba ministériu maibé seidauk konsege rezolve.
“Ami husu ho hakaraik-an ba Primeiru-Ministru IX Governu atu orienta Ministériu Obra Públika (MOP) atubele tau matan ba ponte Uelolo, Dilór no Uma Tolu,” nia akresenta.
Notísia relevante : Autoridade no abitante Uatucarbau ho inisiativa aterru rai ba ponte kotu
Nia fó hanoin, ponte sira-ne’e presiza rezolve atu populasaun sira bele lori produtu lokál sira hanesan hudi, batar no seluk tan hodi halo negósiu no seluk bele asesu ba merkadu.
“Ohin loron ami halerik loos ba dalan sira tanba ponte kotu kuaze tinan barak maibé seidauk rezolve, la hatene bainhira maka bele rezolve atu ami bele halo viajen no labele difikulta hanesan daudaun. Hosi Lacluta bá Viqueque ponte Uma-Tolu kotu, tempu udan mota tun ita labele liu, hanesan mós ponte rua ne’e,” Autoridade postu tenik.
Ponte Uma Tolu kotu tanba impaktu hosi udan, enkuantu ponte Uelolo mosu sedimentasaun halo mota halai tuir dalan no mota Dilor bainhira tempu udan transporte labele liu tanba ponte kotu, nune’e karreta no motorizada liu hosi mota, maibé iha tempu udan komunidade labele halo movimentu hosi ponte tolu ne’e.
Jornalista : Vitorino Lopes da Costa
Editora : Julia Chatarina
