JMJ Lisboa manifesta fé no fraternidade umana
DILI, 17 jullu 2023 (TATOLI)—Diretór Ezekutivu Juventude Katólika Arkedioseze Dili, Padre Cirílio dos Santos Maia, hateten, atividade Jornada Mundiál Juventude (JMJ) ne’ebé tinan ne’e sei hala’o iha Lisboa, Portugal manifesta fé no fraternidade umana.
“Partisipasaun Jornada Mundiál Juventude iha Lisboa Portugal ho tema ‘Maria hit-an lalais’ importante ba kreda Timor, liu-liu ba peregrina sira ne’ebé sei ba partisipa eventu ida-ne’e, tanba dahuluk atu hatudu manifestasaun fé no fraternidade umana,” Padre Cirílio dos Santos Maia, hateten liuhosi programa live streaming entrevista eskluziva ne’ebé hala’o iha estúdiu Agência Tatoli, Farol, segunda ne’e.
Nia dehan, manifestasaun fé hatudu uniaun identidade no dignidade nu’udar ema sarani.
“Ema sarani katak joven ne’ebé iha espíritu di’ak ba kreda no nasaun tanba Amu Papa hakarak joven sai apostu ba joven. Joven ne’ebé hatene fó moris, katak fó ita-nia moris ba Maromak buka uluk reinu Maromak, no keta baruk fó tempu ba Maromak,” nia akresenta.
Notísia relevante : CNJCTL lansa atividade Jornada Mundiál Juventude
Nune’e, Amu husu ba joven timor-oan ne’ebé sei partisipa eventu JMJ ne’e tenke aproveita didi’ak tanba iha eventu ne’e joven sira sei reflete misionáriu foin-sa’e ne’ebé sentraliza iha Jesus Kristu.
“Husu ba Juventude ne’ebé hetan ona oportunidade partisipa iha JMJ, bainhira filafali bele partilla fali ba malu ba sira ne’ebé la hetan oportunidade tanba iha eventu ne’e joven sira sei hasoru direitamente Amu Papa Francisco no rona direitamente liafuan sira,” nia hameno.
Joven hamutuk 50 sei arranka iha loron 21 jullu 2023 hosi Dili bá Lisboa, enkuantu joven balun antes ne’e iha ona Portugal, nune’e joven 100 resin mak sei partisipa iha jornada ne’e.
“Ita mós sei hatudu identidade liuhosi dansa kultura sira, daudaun ne’e ita-nia ekipa preparadu ona no hein aranka,” Amu tenik.
Notísia relevante : Joven timor-oan 100 sei partisipa atividade JMJ iha Lisboa
Jornalista : Arminda Fonseca
Editora : Julia Chatarina
