DILI, 17 jullu 2023 (TATOLI) – Ministériu Edukasaun (ME) daudaun halo impresaun ba kaderneta eskolár rihun 135 atu disponibiliza ba estudante eskola bázika no sekundáriu sira.
Diretór Gabinete Avaliasaun no Dezenvolvimentu Kurrikulár, Mateus do Rosário, informa katak husi kaderneta rihun 135 ne’e sei distribui rihun 45 ba eskola bázika no rihun 90 ba sekundária.
“Ha’u simu informasaun husi sentru impresaun katak imprime ona kaderneta eskolár rihun 58, restu seidauk tanba menus suratahan”, Mateus informa iha Vila Verde.
Nia salienta bainhira sentru impresaun hetan ona apoia suratahan husi ministériu, maka bele aselera prosesu impresaun iha fulan rua nia laran no bele halo distribuisaun, iha tinan oin, ba estudante sira, nune’e labele difikulta inan-aman sira atu akompaña oan sira-nia progresu.
Dirijente ne’e relata katak Gabinete Kurrikulár halo nafatin esforsu hodi imprime kaderneta eskolár, tanba dirijente kada eskola sira sempre husu alunu sira-nian kaderneta.
“Asuntu kaderneta eskolár ne’e obrigasaun Gabinete Kurrikulár nian hodi prepara atu kada tinan bele halo distribuisaun bazeia ba númeru alunu foun ne’ebé mai rejista no la presiza hein eskola mak husu. Agora ho kestaun sira hanesan ne’e maka prosesu ba oin sei buka meius atu prepara stock bazeia ba nivel eskolaridade”, garante.
Relasiona ho kaderneta eskolár, estudante ensinu báziku no sekundária hamutuk 10.720 iha Manatuto laiha kaderneta durante tinan lima.
Diretór Servisu Edukasaun Munisípiu Manatuto, Graciano de Jesus Batista, dehan estudante hamutuk 10.720 ne’ebé seidauk hetan kaderneta ne’e kompostu husi primeiru no segundu siklu na’in-9.220 no ensinu sekundáriu hamutuk 1.500.
Responsavel ne’e realsa katak estudante 3.631 iha eskola bázika terseiru siklu nian kuaze hetan hotu ona kaderneta. Tanba ne’e, nia husu nafatin ba diresaun kompetente atu tau atensaun ba asuntu ne’e.
Notísia relevante: Estudante rihun 10-resin iha Manatuto laiha kaderneta eskolár
Jornalista: Tomé Amado
Editora: Maria Auxiliadora
