iklan

NASIONÁL, EKONOMIA, HEADLINE

IX Governu hakarak halo planu integradu infraestrutura ho obra kualidade

IX Governu hakarak halo planu integradu infraestrutura ho obra kualidade

Diskusaun programa IX Governu Konstitusionál ba loron dahuluk iha plenária Parlamentu Nasionál, tersa (18/07/2023). Imajen Tatoli/Egas Cristóvão

DILI, 18 jullu 2023 (TATOLI)–IX Governu Konstitusionál kompromete sei dezenvolve infraestrutura entre tinan 2007 to’o 2017 tanba konsidera setór infraestrutura nu’udar motór ba dezenvolvimentu nasionál, ne’ebé bele aselera kapitál sosiál, kresimentu ekonómiku, kriasaun empregu no konsolidasaun iha instituisaun.

“IX Governu Konstitusionál hakarak rekupera fali impetu ida-ne’e no kaer fali planu integradu ba infraestrutura ho obra kualidade no proporsionál ba investimentu,” Primeiru-Ministru (PM), Kay Rala Xanana Gusmão, hateten durante aprezentasaun programa IX Governu Konstitusionál, iha planária Parlamentu Nasionál, tersa ne’e.

Nune’e, Xefe Governu reafirma katak durante loron-120 sei halo levantamentu nesesidade prinsipál ba manutensaun estrada no normalizasaun mota iha país tomak hodi bele hahú obra reabilitasaun urjente iha tinan 2024.

Notísia relevante :  Xanana orienta MOP halo intervensaun infraestrutura hetan impaktu dezastre naturál

Tanba ne’e, Governu deside troka estrada prioritáriu sira iha faze rua, no sira ne’ebé urjente liu mak estrada ne’ebé liga bá postu administrativu sira no estrada rurál, hafoin estrada urbana iha munisípiu Ainaro, Baucau, Bobonaro, Ermera, Lautém no Viqueque.

Aleimde ne’e, sei reforsa investimentu iha asesu ba bee potável no saneamentu báziku tanba nota katak kondisaun sira-ne’e esensiál ba saúde públika no kuantidade vida populasaun.

“Ba ida-ne’e, sei aprova no implementa planu investimentu, polítika no reforma instituisaun tinan 2023-2030 atubele kumpri objetivu ne’ebé define ona iha Planu estratéjiku Dezenvolvimentu (PED) no Objetivu Dezenvolvimentu Sustentável (ODS). Planu ida-ne’e sei identifika investimentu nesesáriu ba abastesimentu bee no saneamentu iha país tomak,” Xefe ezekutivu argumenta.

Governo mós sei kontinua asegura katak populasaun tomak hetan asesu ba eletrisidade liuhosi espansaun ba programa eletrifikasaun nasionál.

“Kona-ba Ataúru, sei realiza estudu viabilidade atubele konkretiza planu sustentável ba eletrifikasaun illa Ataúru,” nia kompromete.

Eis Prezidente Repúblika ne’e dehan, IX Governu mós sei estabelese Gabinete Rekursu Naturál Renovável, ne’ebé sei koordena ninia asaun iha nível intersetoriál, realiza analize no estudu viabilidade relevante ba setór-ne’e. Atu sai nu’udar responsável ba implementasaun projetu enerjia renovável, inklui ninia jestaun, monitorizasaun no avaliasaun.

“Iha ámbitu ida-ne’e, Governu hakarak imolementa projetu pilotu ba enerjia renovável hanesan konstrusaun sentrál iha Larigutu (Viqueque) no iha Bobonaro ba dezenvolvimentu eóliku, no mós sei investe iha sistema enerjia solar nian inklui sei dezenvolve estudu viabilidade ba konstrusaun sentrál termoelétrika iha Dili atu prodús enerjia hosi lixu doméstika no lixu industriál”. Xanana salienta.

IX Governu Konstitusionál komprometidu atu konklui instalasaun Kkbu fibra óptika hodi garante ligasaun internet ho kualidade ba sidadaun hotu iha país tomak.

Governu mós kompromete atu haree fali ba planu no investimentu iha transporte terrestre, marítima no aéreu ho destaka ba inisiativa sira hanesan halo revizaun profunda ba kódigu estrada ho insidénsia ba aumentu seguransa liuhosi kriasaun aula obrigatória prévia ba ezame kondusaun.

Hadi’a instalasaun portuária iha Com (Lautém), no Ataúro. Konstrusaun instalasaun portuária ida iha Kairabele (Vemasse) atu fasilita asesu hosi tasi no fó ba setór turizmu halo estudu viabilidade ba konstrusaun portu iha munisípiu Manatuto no ba kriasaun liña marítima nasionál ida.

Ezekutivu sei halo mós reestrutura no moderniza Portu Dili hodi transforma ba mariña sidade portu ba kruzeiru, dezenvolve planu ba aeroportu internasionál no hala’o espansaun, dezenvolve estudu viabilidade ba aeroportu munisipál no operasionaliza Aeroportu Suai (Covalima).

Jornalista     : Antónia Gusmão

Editora         : Julia Chatarina

iklan
iklan

Leave a Reply

iklan
error: Content is protected !!