COVALIMA, 18 jullu 2023 (TATOLI)–Diretór Munisipal Konservatóriu Rejistu Notariadu Covalima, António Sarmento, hateten Rejistu Notariadu Covalima hahú halo atendimentu ba sidadaun sira trata Billete Identidade (BI) ho normál no husu ba sidadaun sira hakbesik-aan ba notariadu atu print-out Billete Identidade orijinál.
Notísia Relevante: Rejistu Notariadu Covalima print-out BI provizóriu uza surat-tahan mutin
“Ohin, ami hahú halo atendimentu ba sidadaun sira trata Billete Identidade ho normál tanba antes ami print-out Billete Identidade provizóriu ho surat-tahan mutin de’it. Tanba ne’e, ami husu ba sidadaun sira hakbesik ba notariadu atu print-out Billete Identidade orijinál,” Diretór Munisipal Konservatóriu Rejistu Notariadu Covalima, António Sarmento, hateten ba Agência Tatoli iha nia kna’ar fatin, Bairru Rompe, tersa ne’e
Tanba ne’e, nia husu ba sidadaun sira-ne’ebé antes ne’e print-out Billete Identidade ho surat-tahan mutin ne’e, bele hakbesik aan ba Rejistu Notariadu atu hetan Billete Identidade (BI) orijinál.
Nia hateten, ho problema Gir Printer ba BI ne’e tohar maibé Rejistu Notariadu kontinua halo atendimentu ne’ebé konsege print-out BI provizóriu ba sidadaun 1000-resin ho surat-tahan mutin de’it.
Entretantu, tuir dadus hahú fulan-janeiru to’o fulan-maiu sidadaun ne’ebé trata sertidaun moris hamutuk 11,60, sertidaun kazamentu na’in-36, sertidaun óbitu na’in-35 no sertidaun trata rejistu kriminál hamutuk na’in-852.
Jornalista : Celestina Teles
Editór : Cancio Ximenes
