VIQUEQUE, 19 jullu 2023 (TATOLI)—Abitante aldeia Buanurak, suku Uabubu, postu administrativu Ossu, munisípiu Viqueque ho inisiativa realiza feira hodi selebra loron istória armada levantamentu tinan 1983.
“Hosi feira ne’e, ita-nia abitante sira sei loke jogu bola guling, futu manu, fa’an produtu lokál durante loron-43, ne’ebé sei ramata iha loron 01 setembru,” Prezidente Konsellu Veteranu munisípiu Viqueque, Adriano Camara ‘Lentil’, informa ba Agência Tatoli, iha Buanurak, kuarta ne’e.
Objetivu feira ne’e atu valoriza istória levantamentu no kuda nafatin espíritu nasionalizmu no patriotizmu.
Notísia relevante : MTCI-MAE loke feira nasionál iha portu
Nune’e, Veteranu ne’e husu abitante hotu tenke kria pás no unidade durante atividade ne’e la’o no juventude sira tenke apoia parte seguransa.
“Atividade feira ba selebrasaun loron levantamentu 1983 ne’e foin lalais semana kotuk Autoridade munisípiu Viqueque, Administradór postu Ossu, Komandante Polísia Nasionál Timor-Leste (PNTL) no Komandante FALINTIL- Forsa Defeza Timor Leste (F-FDTL), Xefe suku no Xefe aldeia sira halo abertura. Ha’u nafatin husu ba abitante sira labele konsumu álkool hodi kria problema, nune’e to’o loron 01 setembru ita sei inaugura monumentu levantamentu 1983 ne’ebé daudaun ne’e sei konstrui iha área Buanurak,” nia akresenta.
Iha fatin hanesan, Komadante PNTL, Superintendente, João da Costa, husu abitante sira atu kolabora hamutuk hodi kria pás no estabilidade durante feira.
“Atu buat hotu la’o di’ak, ita tenke fó kontribuisaun maka’as ba parte seguransa hodi labele hamosu asidente ruma iha fatin feira. Ita presiza promove produtu lokál,” nia tenik.
Jornalista : Vitorino Lopes da Costa
Editora : Julia Chatarina
