COVALIMA, 19 jullu 2023 (TATOLI)–Implementasaun Programa Mão de Obra Postu Administrativu (PMOPA) faze daruak iha suku Labarai, postu administrativu Suai, munisípiu Covalima ho programa prióridade sira hanesan hala’o limpeza jerál, hamoos baleta no halo lutu haleu ba bee-matan.
“Implementasaun programa Mão de Obra Postu Administrativu (PMOPA) faze daruak iha suku Labarai ne’ebé implementa iha aldeia ne’ebé estabelese iha suku Labarai ne’ebé hanesan iha aldeia Meop no Horba hala’o limpeza jerál no hamoos baleta,” Xefe suku Labarai, Mozinho Amarál, hateten informa ba Agência Tatoli, iha suku Labarai, kuarta ne’e.
Suku Labarai, postu administrativu Suai iha nia aldeia sira hanesan Mukbelis, Roek, Bonuk, Holba no Meop ne’ebé daudaun ne’e implementa ona programa Mão de Obra Postu Administrativu (PMOPA) faze daruak.
Programa PMOPA faze daruak implementa iha aldeia sira hanesan Meop no Horba hala’o limpeza jerál no hamoos baleta ne’ebé kada grupu traballadór na’in-20 no hala’o servisu durante loron-20, maibé iha aldeia Bonuk halo lutu ba bee matan ne’ebé hala’o servisu durante loron-10 no aldeia Mukbelis mós halo limpeza hala’o servisu durante loron 10.
Implementasaun programa PMOPA iha suku Labarai, postu administrativu Suai, munisípiu Covalima trabaldór sira hahú hala’o servisu iha loron 18 fulan-jullu tinan 2023 ne’ebé traballadór sira-ne’e hala’o servisu balun to’o de’it loron 10 no balun to’o loron 20.
Antes ne’e, Sekretáriu Administrasaun Munisípiu Covalima, Francisco de Jesus Alves, hateten implementasaun programa Mão de Obra Postu Administrativu kada postu administrativu ho nia orsamentu rihun 100 ne’ebé ho nia ezekusaun faze dahuluk ezekuta 50% no faze daruak 50%.
Jornalista : Celestina Teles
Editór : Cancio Ximenes
