OÉ-CUSSE 20 jullu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hamutuk komunidade sira, kinta ne’e hatuur fatuk dahuluk hodi reabilita estrada rejionál hosi Nunuheno, suku Cunha envolve aldeia Usapibela, suku Lalisuk to’o suku Taiboko, sub-rejiaun Pante Makasar ho distánsia kilómetru 14.
Notísia relevante: RAEOA reabilita estrada rejionál Oebaha liga ponte Bitopa ho kustu rihun $544-resin
Arsénio Paixão Bano, hateten, reabilitasaun ne’e faze dahuluk, maibé planeia ba futuru, sei aumenta-tán atu sa’e to’o sub-rejiaun Nítibe, liga ba suku Lela-Ufe liuliu aldeia Mahata hodi liga direita ba ponte Noetoko.
Nune’e, nia husu autoridade komunitáriu hamutuk komunidade kolabora no serbisu hamutuk ho kompañia, atu fasilita projetu ne’e bele la’o ho susesu.
“Tanba ita sei halo estrada ne’e atu fasilita imi, liuliu iha Nunuheno, tanba bainhira mota sa’e maka’as ne’e, hosi Nítibe tún mai laiha problema, hosi Pássabe atu tún mai laiha problema tanba ponte Bitopa no Noetoko ita halo ona, ide-ne’e ita halo atu Oé-Cusse bele asesu labele iha problema, ita lori dezenvolvimentu ne’e to’o suku hotu-hotu, ita halo esforsa maka’as, atu Oé-Cusse ne’e tenke ba oin,” Arsénio Bano, ko’alia iha serimónia hatuur fatuk dahuluk ne’e.
Diretór Rejionál Infraestrutura, Candido dos Reis Amaral, enkoraja kompañia Lifau Indah Unipesoál Lda, iha prosesu ezekusaun presiza kumpre kontratu no garante projetu ho kualidade.
“Liuhosi lansamentu ne’e, ami hakarak fó hanoin nafatin ba kompañia atu oferese servisu ne’e ho kualidade ba ita hotu, ami husu ba kompañia atu respeitu no kumpre termu kontratu ne’ebé iha no regra sira-ne’ebé maka estabelese ona iha kontratu,” nia husu.
Xefe suku Cunha, Domingos Seko Caunan, reprezenta komunidade suku Cunha ho Taiboko, agradese ba Autoridade RAEOA, tanba iha hanoin no polítika di’ak atu halo dezenvolvimentu liuliu ba estrada rurál.
“Ita-nia komunidade, hosi parte Taiboko no Cunha no Lalisuk sorin, no hosi sub-rejiaun Nítibe, ba estrada ida-ne’e, durante ne’e sira hetan difikuldade barak liuliu iha tempu udan, nune’e ami agradese tebes ba Autoridade tanba iha planu di’ak hodi reabilita estrada ne’e,” nia agradese.
Entretantu, kompañia Lifau Indah Unipesoál Lda ezekuta projetu reabilitasaun estrada rejionál kompleta ho dreinajen no ponte sira.
Valór kontratu ba projetu ne’e hamutuk $738,204,15, orsamentu ne’e Autoridade RAEOA foti hosi Orsamentu Jerál Estadu (OJE) 2023, ho durasaun servisu fulan sia (9), huhú iha loorn 03 juñu 2023 sei termina iha loron 03 abríl 2024.
Notísia relevante: RAEOA implementa programa CBM ba suku 18 ho fundu rihun $100
Jornalista: Abílio Elo Nini
Editór: Evaristo Soares Martins
