DILI, 20 jullu 2023 (TATOLI) – Ministériu Edukasaun avalia implementasaun Projetu Konstrusaun no Reabilitasaun Infraestrutura Edukativa (PKRIE) 202 ne’ebé halo ona durante tinan tolu (2021-2023) hodi bele hatene nia progresu no dezafiu sira.
Avaliasaun ne’e partisipa husi Ministra Edukasaun, Dulce de Jesus, no Sekretáriu Estadu Edukasaun Ensinu Sekundáriu ba Eskola Téknika, Domingos Lopez Lemos, hodi rona informasaun husi Diretór Infraestrutura Eskolár no tékniku sira, nune’e bele hatene nia lala’ok no kontinua apoiu projetu refere.
“Ami hasoru malu ona ho parte Diresaun Nasionál Dezenvolvimentu Parke Eskolár no tékniku sira atu hatene kona ba progresu no dezafiu saida maka sira hasoru durante implementasaun PKRIE hamutuk 202 ne’e”, Domingos Lemos reitera iha Vila Verde, kinta ne’e.
Implementasaun PKRIE iha territóriu dezde 2021 konsege inaugura ona eskola hamutuk 150-resin, maibé iha projetu balun maka oras ne’e sei iha hela prosesu nia laran, tanba balun hetan difikuldade, liuliu mudansa klimátika ne’ebé halo projetu ne’e tenke adia nia prosesu konstrusaun no reabilitasaun.
Governante ne’e dehan hafoin sira rona tiha esplikasaun sira, sei buka solusaun atu rezolve difikuldade ne’ebé maka diresaun infraestrutura enfrenta, nune’e bele aselera PKRIE ne’ebé seidauk remata.
“Intensaun husi IX Governu nian maka buat ne’ebé konsidera di’ak ba progresu no dezenvolvimentu nasaun, ida ne’e tenke kontinua hala’o. Nune’e mós PKRIE ne’ebé konsidera atu dezenvolve edukasaun iha Timor-Leste tenke kontinua apoiu, nune’e bele
Husi eskola 202 ne’ebé balun sei iha hela prosesu ne’e inklui mós projetu 12 maka tama iha kapitál dezenvolvimentu.
“Ita sei bolu kompañia sira hotu ne’ebé kaer projetu konstrusaun ba eskola 12 ne’e atu rona sira-nian razaun tanba saida maka to’o agora seidauk finaliza. Tuir termu kontratu ba projetu ne’e halo durante fulan neen. Kuandu la konklui maka estende tan ba fulan neen, maibé nafatin la konklui ne’e razaun saida”, kestiona.
Tanba ne’e presiza rona tiha sira-nian razaun maka parte ministériu sei foti konkluzaun ba projetu kapitál dezenvolvimentu sira ne’ebé maka daudaun ne’e la’o ona iha terrenu. “Karik iha kompañia sira ne’e maka balun la serbisu ho responsabilidade, ministériu iha obrigasaun atu foti desizaun. Se la’e todan hotu bele tula fali ba diresaun no ministériu nia leten”, realsa.
Projetu konstrusaun no reabilitasaun ba estabelesimentu edukativu iha 202 ho sala-de-aula hamutuk 657 ho ninia orsamentu liu millaun $20.
Notísia relevante: ME distribui materiál konstrusaun ba PKRIE sia
Jornalista: Tomé Amado
Editora: Maria Auxiliadora
