iklan

NASIONÁL, HEADLINE, POLÍTIKA

Ministru Adjuntu Nong Rong hasoru PR Horta reafirma kompromisu apoia Timor-Leste

Ministru Adjuntu Nong Rong hasoru PR Horta reafirma kompromisu apoia Timor-Leste

Prezidente Repúblika, José Ramos Horta (loos), hasai foto hamutuk ho Ministru Adjuntu Negósiu Estranjeiru Xina, Nong Rong (karuk), iha Palásiu Prezidensiál, Bairro Pité, kinta (20/07/2023). Imajen Tatoli/Egas Cristóvão

DILI, 20 jullu 2023 (TATOLI)-Ministru Adjuntu Negósiu Estranjeiru Xina, Nong Rong, halo vizita mai Timor-Leste no iha kinta ne’e, hasoru malu mós ho Prezidente Repúblika (PR), José Ramos Horta.

“Ha’u kontente tebes hamutuk ho ha’u-nia delegasaun hasoru malu ho Prezidente Repúblika, ha’u hato’o ba Prezidente kona-ba kompromentu hosi ami-nia Prezidente Xi Jinping. Iha hasoru malu ne’e Prezidente Horta mós  fó sai kona-ba relasaun no amigável  ho Xina ho tempu naruk,” Nong Rong hateten hafoin hasoru Xefe Estadu, iha Palásiu Prezidensiál, Bairro Pité, kinta ne’e.

Nia relembra katak, Prezidente Repúblika Horta hala’o vizita ba Xina iha tinan 1976, ne’ebé hato’o aspetativa ba nasaun rua, partikularmente ba dezenvolvimentu desde Timor-Leste hetan independénsia.

“Ha’u ho ha’u-nia ekipa  kontente tebes tanba haree atijimentu boot iha Timor-Leste durante tinan 20 liubá. Ami mós satisfeitu ho relasaun bilaterál entre Xina no Timor-Leste iha tinan 20 nia laran. Ami mós orgullu bele fó asisténsia tuir saida mak ami bele ba maun no alin sira iha Timor-Leste,  atu dehan edifísiu ne’ebé agora ita hamriik ba daudaun, Pálasiu Prezidensiál konstroi ho asisténsia Xina nian,” Ministru Adjuntu ne’e haktuir.

Notísia relevante : Investór Xina fó prioridade ba konstrusaun plaza estrela lima iha Dili

Nia salienta, durante tempu naruk Xina ho Timor-Leste mutuamente fó apoiu ba malu, liu-liu organizasaun internasionál sira nasaun rua sempre fó apoiu ba malu no serbisu hamutuk ba interese komún.

Xina husu Timor-Leste apoiuapolítika ‘The one policy‘ ne’ebé iha estatutu Xina nian katak, Taiwan hola parte ba Xina.

“Ami fiar katak liuhosi lideransa Xefe Estadu na’in-rua ita sei halo progresu boot iha futuru. Ami espera katak relasaun bilaterál entre nasaun rua sei la hotu no laiha rohan, no dezenvolvimentu iha Timor-Leste sei hetan rezultadu boot,” nia otimista.

Durante reuniaun, Prezidente Horta hateten katak nia iha interasaun ho parte hosi Xina depois tinan 1976.

“Nia (PR) mós fó prinsípiu matadalan no opiniaun  kona-ba relasaun bilaterál nasaun rua no entre Ministru Negósiu Estranjeiru rai-rua,” nia tenik.

Ministru Adjuntu Negósiu Estranjeiru ho delegasaun to’o iha Dili iha kuarta (19/07), tuir ajenda iha sexta (aban) sei hasoru malu mós Primeiru-Ministru, Kay Rala Xanana Gusmão.

Jornalista     : Antónia Gusmão

Editora          : Julia Chatarina

iklan
iklan

Leave a Reply

iklan
error: Content is protected !!