PD hakarak altera lei CAC

DILI, 20 jullu 2023 (TATOLI)—Xefe bankada Partidu Demokrátiku (PD) iha Parlamentu Nasionál, Deputadu António da Conceição ‘Kalohan’, hateten hanoin ona atu altera lei Komisaun Anti Korrupsaun (CAC, siglá portugés), ba artigu ne’ebé ko’alia kona-ba korum funsionamentu atu hili Komisáriu CAC nian.
Notísia Relevante: Aniceto Guterres: meza kontinua ajenda eleisaun ba Komisáriu CAC
“Agora daudaun ami hanoin muda de’it lei, depois hili la presiza Deputadu prezente na’in-43, hanoin atu hadi’a (lei CAC),” Xefe Bankada PD ne’e hateten ba jornalista sira iha uma fukun Parlamentu Nasionál, kinta ne’e.
Tambá ne’e, nia dehan, hanesan bankada Governu PD daudaun hanoin ona no sei aprezenta inisiativa hodi altera tiha lei ne’e no nafatin prefere kandidatu ida tenke indepedente.
Vise Bankada CNRT, Patrocínio Fernandes, seidauk bele antesipa ko’alia kona-ba kandidatu komisáriu CAC atu mai ka lae, tanba akompaña iha programa IX Governu liuliu iha área justisa no boa-governasaun ninian haree buat lubun ida prevista katak atu revizaun, entaun nia-parte aguarda ida-ne’e sei la fó komentáriu hodi hein prioridade saida mak Governu hakarak hadi’a iha setór justisa nian.
“Em prinsípiu ita hanoin katak, instituisaun sira-ne’e Estadu harii atu bele salva guarda ita-nia rekursu Estadu nian no serbisu atu kombate korrupsaun no bele asegura boa-governasaun iha ita-nia rain, ne’e buat ida importante bele haree. Maibé, ita mós tenke apar ho programa Governu ne’ebé iha, entaun ita hein to’ok tau uluk prioridade atu haree ba setór sira-ne’e,” nia hateten.
Deputadu FRETILIN, Antoninho Bianco, hateten kona-ba kandidatu komisáriu CAC asuntu ne’e husu ba Governu, tanba esforsu uluk VIII Governu aprezenta ona, maibé to’o ikus la konsege, ne’ebé hein bele aprezenta fali kandidatu ida karik di’ak no ita bele fó kontribuisaun, tanba harii instituisaun ida atu la’o tenke iha ema maibé ema ne’ebé prienxe rekezitu tuir lei.
Antes, ne’e Prezidente Parlamentu Nasionál, Maria Fernanda Lay, hateten Parlamentu Nasionál hein IX Governu bele aprezenta kandidatu komisáriu CAC mai iha PN no ida-ne’e kompeténsia Governu mak bele submete, hafoin mai ona iha PN mak sei ajenda ba plenária hodi hala’o eleisaun.
Jornalista : Nelson de Sousa
Editór : Cancio Ximenes

