Xefe suku Tapo husu IGEADI normaliza kondisaun estrada Oe-Leu ho urjénsia
MALIANA, 20 jullu 2023 (TATOLI) — Xefe suku Tapo, postu administrativu Bobonaro, Xavier Barreto Cardoso, husu Ministériu Obra Públika orienta Institutu Jestaun Ekipamentu Apoia Dezenvolvimentu Infraestrutura, Institutu Públiku (IGEADI, I.P, sigla portugés), Brigada Maria-Tapo, atende kondisaun estrada Oe-Leu ho urjénsia tanba grave liu.
Nia haktuir, IGEADI, Brigada Maria-Tapo, foin lalais ne’e mobiliza ekipamentu pezadu ba halo intervensaun estrada kotu iha área Zulo-II, suku Lontas, postu administrativu Lolotoe, Munisípiu Bobonaro, maibé seidauk atende.
Nune’e mós durante mobilizasaun materiál, ekipa Brigada Maria-Tapo liuhosi estrada aldeia Mologen, suku Oe-leu, maibé la liga ka la’o liu de’it, maske kondisaun estrada refere hela de’it rohan atu kotu totál.
Notísia Relevante:Estrada liga suku Oe-leu ba Lolotoe ameasa atu kotu
“Ami-nia problema mak iha Oeleu nia leten mai, dalan kotu ne’e, horibainhira ekipamentu pezadu liuhosi ne’ebá duni, maibé la konsege hadi’ak, dalan atu kotu ona, maibé iha momentu ne’ebá sira mós liuhosi fatin ne’e maibé la konsege hadi’ak, sira liu de’it,” nia ko’alia iha suku Tapo, tersa ne’e.
Estrada refere ámeasa atu kotu, hafoin akontese udan-boot iha fulan-janeiru tinan 2023 ne’e.
Alende ne’e iha fulan-abríl tinan 2021 ne’e mós kotu, hafoin akontese dazastre naturál rai halai, maibé IGEADI konsege halo normalizasaun iha fulan-marsu 2022.
“Ha’u husu IGEADI, sé bele atende lalais hodi fasilita movimentasaun krareta ho motorizada, sé lae udan mai tán estrada ne’e kotu, ne’e difikulta tebes komunidade atu asesu ba-mai, liuliu ami sira hela iha Tapo, Leber no sira hosi Lolotoe,” Xefe suku Xavier akresenta.
Motorista kamioneta, José Soares Moises, konsidera estrada ne’e bele fó ameasa ba ema-nia vida bainhira tula sasán todan, tanba ne’e nia husu ba Ministériu Obra Públika atu orienta IGEADI halo normalizasaun ho urjénsia.
“Estrada ne’e aat, besik kotu ona, maibé to’o agora ita-nia boot sira seidauk hadi’ak, ami ho karreta liu iha-ne’e mós sente ta’uk fali, tanba sorin-sorin rai naruk hotu, ita liu klaran oan ne’e de’it mós hela de’it dalan karreta nian de’it, ne’ebé ami liu tenke atensaun di’diak,” nia fó hanoin.
Enkuantu estrada refere liga hosi suku Oe-leu ba suku Tapo, Leber, postu administrativu Bobonaro no ba to’o suku hitu iha postu administrativu Lolotoe, munisípiu Bobonaro no munisípiu Covalima.
Tuir observasaun Jornalista Tatoli iha terrenu nota katak, karreta ka motorizada atu ultrapasa ba-mai hasoru malu tenke hein malu, ida liu tiha mk foin bele liu, tanba dalan kloot no sorin-sorin rai naruk.
Entretantu estrada ne’e konstrui hosi kompañia nasionál Marabia Unipesoal Lda, iha 2010 no entrega ba Governu iha 2016.
Notísia relevante:IGE sei normaliza estrada diresaun Halimesak to’o Oe-leu
Jornalista : Sérgio da Cruz
Editór : Evaristo Soares Martins
