BOBONARO, 04 marsu 2022 (TATOLI) – Ekipa Institutu Jestaun Ekipamentu, Institutu Públiku (IGE,I.P sigla portugés) Rejiaun IV Maliana, sei halo normalizasaun estrada diresaun Halimesak, suku Odomau, postu administrativu Maliana ba to’o suku Oe-leu, postu administrativu Bobonaro iha tempu badak.
Kondisaun estrada públiku ne’e estraga hosi dezastre naturál hafoin udan-boot durante semana ida, hahu hosi loron 23 to’o loron 28 fulan-fevereritu 2022 difikulta movimentasaun transporte públiku.
Pedidu kona-ba normalizasaun IGE Maliana simu iha tinan 2021 liubá no ekipamentu sira balu destaka ona iha área refere.
“Horisehik ha’u orienta ona tékniku sira halo manutensaun ba ekipamentu serbisu, aban sira komesa halo ona normalizasaun estrada públiku hosi Halimesak nian ba to’o suku Oe-Leu nian,” Xefe Ekipa IGE,I.P Rejiaun IV Maliana, Aguido Leto, informa Agência TATOLI, liuhosi telefónika, sesta ne’e. Nia fó-sai katak, totál ekipamentu pezadu ne’e preparadu atu halo intervensaun rápida ba estrada hirak-ne’e kompostu hosi ekavatór rua, karreta kamioneta ida no tanki mina nian ida sei mantein iha terrenu to’o remata.
Nia husu ba komunidade ne’ebe utiliza estrada refere atu koopera ho tékniku sira iha terrenu, nune’e prosesu normalizasaun bele la’o ho lalais antes udan.
Xefe Suku Oe-leu, Januário Bragança, sente kontente rona informasaun ne’e, tanba bele responde ona sira-nia pedidu ne’ebe subemete ona maske ho tempu ne’ebé kleur.
“Ami autoridade lokal fiar katak, aban IGE bele halo ona normalizasaun ba estrada nakfera sira- ne’e, sé lae udan mai tán monu hotu kedas, ami mós prontu koopera ho sira atubele aselera lalais serbisu,” nia katak.
Entertantu komunidade ne’ebé utiliza estrada refere hosi postu adminístrativu Maliana nian iha suku tolu kompostu hosi suku Lahomea, aldeia Galisapulu, no suku Odomau, aldeia Anahun no suku Ritabou, aldeia Uat.
Hosi parte postu administrativu Bobonaro ho total suku 18 kompostu hosi suku Leber, Tapo-Taz, Oe-leu, Malilait, Aiasa, Molop, Lour, Sibuni, Lorba, Bobonaro, Atuaben, Soilesu, Ilatlaun, Kota-Boot, Karabau, Mali-ubu, no Kolimau. Dalan ne’e mós liga kedas ba iha postu administrativu Zumalai, munisípiu Covalima.
Enkuantu postu administrativu Lolotoe ho totál suku hitu kompostu hosi Deudet, Lupal, Guda, Lebos, Lontas, Gildapil no suku Opa. Dalan refere liga kedas ba postu administrativu Maukatar, munisípiu Covalima.
Jornalista : Sérgio da Cruz
Editór : Evaristo Soares Martins
