BAUCAU, 21 jullu 2023 (TATOLI) – Dom Leandro Maria Alves sei saran-aan no lao lemorai hodi sai bibi-atan ba sarani sira iha Dioseze Baucau.
Bispu Dioseze Baucau, Leandro Maria Alves, esplika, durante tinan-ida resin sarani Baucau hein nune’e ho frakeza ne’ebé iha sei prontu atu kolabora ho padre inklui sarani sira hodi sai bibi-atan iha Dioseze Baucau.
“Ho Maromak-nia tulun ho imi hotu nia-rohan laek, ha’u sei haka’as-aan atu halo duni ida-ne’e, buat-ne’ebé imi husu mak ema-ne’ebé saran-aan tomak ba Maromak-nia bibi sira katak labele sees atu fó vida ba bibi sira,” Bispu Dioseze Baucau, Dom Leandro Alves hateten iha Igreja Katedrál, Vila Antiga, sesta ne’e.
Dom Leandro Alves, hateten, loron-matan nakboot ona, rai-hun mutin tabu ona iha lorosa’e nia oin rai-hun mutin mai ona nakukun sees tiha, mai ita hotu simu hodi nai-nia naran ho haraik aan husu ba entidade hotu atu ajuda kolabora hamutuk misaun iha Dioseze Baucau.
Dom Leandro Alves konsidera sarani Dioseze Baucau reza durante tinan-ida resin hodi hein no hakarak mak ema-ne’ebé laran tomak hasa’e aan tomak no hakbesik nafatin ba Maromak, ba kreiu sira, relizjoza, reliziozu no sarani sira.
“Ha’u oras-ne’e iha imi-nia leet la’ós atu halo buat seluk maibé atu la’o lemorai hodi halo di’ak ba haklaken nai Maromak ida-ne’ebé bolu haruka ha’u mai-ne’e,” Dom Leandro Alves esplika.
Dom Leandro Alves kompromete sei sai símbolu unidade no la’o hamutuk entre nai-lulik sira, reliziozu, relizioza sira inklui sarani maibé só bele realiza ho de’it Maromak espíritu Santu nune’e implika ema hotu atu la’o lemorai serbisu ba klamar sira.
“Tempu ona ba ita sai la’o lemorai ba buka bibi sira-ne’ebé lakon, kura sira-ne’ebé kanek no dignifika sira-ne’ebé lakon tanba-ne’e inportante liu mai ita-hotu mak orasaun,” Dom Leandro Alves konsola.
Dom Leandro Alves fiar sei la serbisu mesak tanba iha belun padre hotu, relijioza no relijiozu sira inklui sarani Baucau nune’e hatene aan duni hodi hatán ba Maromak-nia bolu liuhosi Santu padre Francisco atu sai bispu ba Dioseze Baucau.
Dom Leandro Maria Alves, agradese no obrigadu ba komisaun organizadora, Prezidente Repúblika, José Ramos Horta, Arsebispu Arkedioseze Metroplitanu, Bispu Dioseze Dili, Dom Virgílio Cardeal do Carmo da Silva, SDB, Prezidente CET no Bispu Dioseze Maliana, Dom Noberto do Amaral.
Agradese mós ba família, órgaun soberanu estadu , membru governu no Parlamentu Nasionál, eis titulár, Bispu Atambua, Dom Dominco Saco, padre no madre, autoridade munisipál Dioseze Baucau, autoridade lokál, seguransa sivíl, militár no sarani sira.
Dom Leandro Alves lidera Dioseze Baucau komposta hosi parókia 22 inklui rezidénsia 24 ne’ebé harii iha fulan-novembru 1996 hosi tótal sarani hamutuk 322.300 komposta hosi munisípiu haat hanesan Manatuto, Viqueque, Lautém no Baucau.
Notísia relevante: Dom Leandro Alves ofisialmente ordenadu Bispu Dioseze Baucau
Jornalista : Natalino Belo
Editór : Evaristo Soares Martins
