EDTL, E.P konklui projetu instalasaun solár panél iha área rurál
DILI, 21 jullu 2023 (TATOLI)—Eletricidade de Timor-Leste, Empreza Públika (EDTL, E.P) daudaun ne’e konklui ona projetu instalasaun sistema solár panél ka solar home lighting system iha área rurál sira.
“Antes ne’e, EDTL, E.P distribui ona solár panél hamutuk unidade 1.091 ba benefisiáriu uma-kain 1.091 iha teritóriu laran la inklui iha Dili,” refere nota ne’ebé Agência Tatoli asesu, seata ne’e.
Hosi benefisiáriu 1.091, iha uma-kain 993 (91%) mak asesu ona no falta uma-kain 98 (9%) mak seidauk asesu.
Notísia relevante : EDTL, E.P monta ona solár panél unidade 1.000 iha territóriu laran
Tuir loos unidade 98 sei monta hotu iha Guruca, Quelicai, maibé tanba Institutu Jestaun Ekipamentu no Apoiu Dezenvolvimentu Infraestrutura, Institutu Públiku (IGEADE, I.P) loke ona dalan iha fatin ne’e, maka komunidade sira labele hetan solár panél, maibé tama fali iha Programa Eletrifikasaun Komunitária (PEK) atu hetan liña eletrisidade.
EDTL, E.P sei haree atu monta unidade ne’ebé seidauk monta iha munisípiu seluk ne’ebé hela iha fatin ho distánsia dook hosi estrada, nune’e tinan-lima ka sanulu mai tan mós seidauk bele asesu estrada.
EDTL, E.P kontrata empreza SM Bark Unipessoal hodi sosa unidade solár panél ho kustu $413.617,30.
Jornalista : Arminda Fonseca
Editora : Julia Chatarina
