VIQUEQUE, 21 jullu 2023 (TATOLI)—Eskola Amiga Geelong hosi Austrália apoia ekipamentu laboratóriu ba Eskola Sekundáriu Jerál (ESJ) 04 Setembru, iha munisípiu Viqueque hodi uza ba prátika matéria fízika, biolojia no kímika.
Koodenadór projetu Eskola Amiga Geelong, Mariano da Silva, hateten, ekipa Eskola Amiga Geelong vizita Timor-Leste ba daruak ona ho objetivu atu promove lian inglés no apoia ekipamentu ba eskola.
“Apoiu ekipamentu laboratóriu kompletu, maibé ninia kuantidade maka ha’u ladun hatene. Ekipamentu sira-ne’e mai hosi organizasaun Geelong hosi Austrália. Nune’e ohin estudante 04 Setembru hamutuk profesór inklui estudante Amiga Geelong Australia hamutuk na’in-18 no profesor na’in-4, halo prátika matéria hosi ESJ 04 Setembru,” Mariano da Silva, informa iha resintu eskola, iha postu Viqueque Vila, sesta ne’e.
Notísia relevante : ESJ 04 setembru Viqueque inisiativa realiza atividade desportiva komemora loron istóriku
Geelong Australia antes ne’e apoia ekipamentu no daudaun ekipa sei rekolla dadus materiál laboratóriu ne’ebé sei kontinua apoia ESJ 04 Setembru.
Iha fatin hanesan, Adjuntu Diretór ESJ 04 Setembru, Hélio Faria Guterres, agradese ba doadór Geelong sira ne’ebé fó ona apoia ba eskola inklui apoia fundu hamutuk $2.000 resin hodi rekruta ema hodi hein laboratóriu ba tinan-ida nian.
“Ekipamentu laboratóriu ne’ebé sira fornese mak hanesan mikroskópiu, solar panél no materiál prátika sira seluk inklui fundu. Hosi ekipamentu sira ha’u sente motiva tebes banhira apreende teoria sira mós bele prátika uza sasán sira-ne’ebé doadór sira oferese ba ami,” nia akresenta.
Estudante siénsia teknolojia klase 3, Feviana Teti Bria Ferdinan, sente orgullu bele hetan apoia ekipamentu laboratóriu no prátika matéria durante loron-ida.
“Ohin ami apreende prátika kona-ba observa seluler ne’ebé maka durante ne’e ami simu teoria hosi ami-nia profesór sira. Liuhosi prátika sira-ne’e bele hasa’e ami-nia koñesimentu iha área espesífiku sira. Ha’u hanoin ba oin Geelong Australia nafatin kolabora ho eskola sira hodi estudante sira bele hetan prátika matéria teknolojia nian,” nia tenik.
Jornalista : Vitorino Lopes da Costa
Editora : Julia Chatarina
