IGEADE, I.P normaliza ona estrada Zulo ba Bobonaro
COVALIMA, 21 jullu 2023 (TATOLI)–Xefe suku Zulo, postu administrativu Zumalai, munisípiu Covalima, João Lopes de Carvalho, hateten Institutu Jestaun Ekipamentu no Apoiu Desenvolvimentu Infraestrutura, Institutu Públiku (IGE, I.P), sesta ne’e, hala’o ona normalizasaun estrada iha suku Zulu, postu Zumalai, munisípiu Covalima ba munisípiu Bobonaro.
Notísia Relevante: Estrada Zulo ba Bobonaro kotu totál
“Ha’u agora ho ekipa hosi IGEADE, I.P hala’o ona normalizasaun estrada ne’ebé foin lalais kotu totál hodi difikulta movimentu ema no transporte públiku ba-mai, tanba impaktu hosi dezastre naturál ho tipu rai-halai,” João Lopes de Carvalho hateten ba Agência Tatoli liuhosi telefónika, sesta ne’e.
Enternatu, Tuir dadus vítima dezastre naturál hosi Suku Zulo, postu Zumalai liuliu hosi aldeia Lale, Obukmil no Leogol, xefe família hamutuk 162 hosi númeru ne’e uma 54 kategória aat totál ne’ebé hetan apoiu emerjénsia no materiál rekuperasaun.
Antes ne’e, Diretór servisu Munisipál Obra Públika Alberto Cardoso hateten durante akontese udan boot identifika kondisaun ponte Lomea ne’ebé lokaliza iha suku Tashilin, postu Zumalai, ponte Rai Ketan iha suku Labarai, postu Suai no ponte Karau Ulun iha suku Ogues, postu Maucatar, difikulta movimentu transporte públiku tanba ponte no estrada mós kotu.
Daudaun ne’e, Servisu Munisipal Obra Públika hamutuk ho ekipa hala’o levantamentu dadus ba estrada no ponte sira-ne’ebé aat iha munisípiu Covalima.
Jornalista : Celestina Teles
Editór : Cancio Ximenes
