COVALIMA, 21 jullu 2023 (TATOLI)–Xefe suku Zulo, postu administrativu Zumalai, munisípiu Covalima, João Lopes de Carvalho, hateten, implementasaun Programa Mão de Obra Postu Administrativu (PMOPA) iha suku Zulo, prióridade hamoos estrada no hamoos vítima dezastre naturál nia uma fatin tanba vítima hirak ne’e simu ona materiál rekuperasaun hosi Governu.
Governu implementa PMOPA aproveita hodi ajuda vítima sira hamoos estrada no uma fatin ba vítima sira-ne’ebé hetan apoiu materiál rekuperasaun atu bele konstrui hikas uma.
“Ita presiza ajuda liuhosi Governu implementa programa PMOPA hamos estrada no hamoos vítima sira-nia uma fatin iha bairru Ula ne’ebé dook hosi akontese dastastre iha Zulo ho kilo metro ida (1) resin, nune’e sira bele konstrui fali uma. Ita fó prioridade ba ita-nia família foin lalais afetadu ba dezastre naturál hamutuk xefe família 57 ne’ebé Governu fó apoiu ona materiál rekoperasaun,” João Lopes de Carvalho ihateten ba Agência Tatoli, liuhosi telefónika, sesta ne’e.
Implementasaun PMOPA faze daruak, traballadór iha aldeia Obukmil ho lale mak servisu durante loron-10, tanba ho razaun atu hamuos estrada no hamoos uma fatin ba vítima sira bele konstrui fali uma ne’ebé hetan estragu hosi dezastre natural.
Xefe suku Belekasak postu Maucatar, Leonito Gusmão, hateten implementasaun Programa Mão de Obra Postu Administrativu ba faze daruak suku Belekasak fó prióridade ba programa sira hanesan hamoos estrada kuda ai-oan no seluk.
Implementasaun PMOPA faze daruak ne’ebé iha postu administrativu Maucatar, suku Belekasak hahú implementa iha loron 17 jullu 2023 ne’ebé traballadór sira balun hala’o servisu durante loron 10 no to’o loron 20 de’it tanba traballdór sira servisu halo rotasaun.
Tuir dadus, traballadór ne’ebé servisu iha implementasaun PMOPA iha suku Belekasak postu Maucatar forma grupu haat ne’ebé kada grupu traballadór 20 nune’e hamutuk-80
Antes ne’e, Sekretáriu Administrasaun Munisípiu Covalima, Francisco de Jesus Alves, hateten implementasaun Programa Mão de Obra Postu Administrativu kada postu administrativu ho nia orsamentu rihun 100 ne’ebé ho nia ezekusaun faze dahuluk ezekuta 50% faze daruak 50%.
Jornalista : Celestina Teles
Editór : Cancio Ximenes
