COVALIMA, 21 jullu 2023 (TATOLI)–Komunidade Fatululik preokupa ho presu foos kilograma 25 ne’ebé baibain faan ho presu $16 ne’e agora sa’e ba $20, tanba de’it distánsia no kondisaun Estrada kotu.
Notísia Relevante: Komunidade Covalima preokupa presu foos $12 sa’e ba $16
“Presu foos iha postu administrativu Fatululik sa’e tanba foin lalais udan boot iha loron 3-4 fulan-jullu halo estrada ligasaun hosi postu Maucatar ba iha postu Fatululik kotu, nune’e halo kioske sira labale sosa foos hosi Suai mai iha postu administrarivu Fatululik,” Komunidade Fatululik, Angelina do Carmo, hateten ba Agência Tatoli iha merkadu Debos, sesta ne’e.
Maske estrada ligasaun hosi postu Maucatar liga ba postu administrarivu Fatululik kotu, njune’e negosiánte sira buka alternativa sosa foos iha Bobonaro liuhosi suku Lebos mai iha postu administrativu no mos buka dalan alternativa liuhoi postu Fohorem, suku Dato rua mai iha postu administrativu Fatululik.
Administradór Postu Administrativu Fatululik, José Afonso, rekoñese presu foos sa’e tanba foin lalais akontese udan boot halo estrada ligasaun postu Maucatar mai postu administrativu Fatululik kotu.
“Ha’u rekuñese presu foos sa’e tanba kestaun infraestrutura foin lalais udan boot estraga estrada lubuk ida mak kotu. Iha semana kotuk, presu foos kilograma 25 ho nia presu sa’e ba $22 maibé agora presu foos $20,” nia dehan.
Presu foos sa’e tanba transporte ne’ebé transporta foos hosi kapitál Suai liuhosi postu administrativu Fohorem foin mai to’o iha postu administrativu Fatululik.
Ho problema ne’ebé mak komunidade enfrenta iha Fatululik, hanesan autoridade postu halo ona kontaktu ba diretór Servisu Obra Públika Covalima maibé diretór hatan hein de’it, tanba iha munisípiu laiha ekipamentu pezadu atu halo normalizasaun ba estrada.
Antes ne’e, iha 18 fjullu 2023, Servisu Munisipal Obra Públika akompañadu hosi ekipa nasionál hala’o ona lavantamentu dadus ba estrada no ponte ne’ebé hetan estragu hosi dezastre natural iha Covalima.
Servisu Munisipál Obra Públika simu relatóriu autoridade hosi postu administrativu ne’ebé dazastre naturál estraga estrada no ponte ne’ebé hetan estragu, iha postu Administrativu Fatululik, Zumalai, Maucatar, Suai, Tilomar no Fohorem.
Tuir dadu, udan boot iha loron 3-4 jullu 2023 ne’e rezulta ponte ne’ebé hetan estragu iha hanesan ponte Lomea lokaliza iha suku Beco, postu Suai iha entre suku Tashilin, postu Zumalai, ponte Rai Ketan lokaliza iha suku Labarai, postu Suai entre suku Belekasak, postu Maucatar.
Jornalista : Celestina Teles
Editór : Cancio Ximenes
