Obidiente no respeitozu nu’udar xave ba susesu Bispu Leandro Alves
BAUCAU, 21 jullu 2023 (TATOLI) – Obidiente no hatudu respeita iha kualkér momentu nu’udar xave prinsipál ba susesu Bispu Leandro Alves, ne’ebé oras ne’e lidera parókia 22 inklui rezidénsia 24 iha Dioseze Baucau.
Aman hosi Bispu Dioseze Baucau, Graciano Alves, espresa sentimentu kontente tanba hamutuk ho nia kaben eduka Dom Leandro Alves hosi kiik susesu iha vida saserdotál nu’udar padre no ikus-mai sai Bispu iha Dioseze Baucau.
“Ami sei dudu nafatin, maske agora Bispu ona maibé ami sempre fó konsellu ba-nia atu la’o ho kna’ar foun ne’e to’o rohan,” Aman hosi Bispu Dom Leandro Alves informa ba Agência TATOLI iha Igreja Katedrál Vila Antiga, sesta ne’e.
Hanesan família kontinua nafatin atu apoia ho orasaun no materiál relasiona ho dominasaun nu’udar Bispu ba Dioseze Baucau bainhira aman-inan sei moris.
Graciano konta bainhira Dom Leandro Alves sei kiik nu’udar oan ne’ebé matenek, liuliu iha ida espiritúal nune’e sempre kuidadu to’o idade atu eskola apoia no suporta iha estudu tanba iha komportamentu di’ak.
“La’ós matenek de’it maibé mos obidiente ba inan-aman no ba profesór sira nune’e ami hamutuk dudu nia ba estuda nafatin iha rai-li’ur atu sai saserdotál,” Graciano Alves akresenta.
Biografia
Dom Leandro Alves hamutuk maun-alin na’in-sia kompostu mane nain-lima no feto na’in-haat hahú estudu iha tinan-1990 to’o 1993 iha SMAK Santo Yoseph, Dili, 1993-1994 iha Ano Propedêutico, 1994-1995 estudu Espiritualidade São João Maria Vianey-Dare.
Iha tinan-1995 to’o 1998 kontinua iha Fakuldade Filozofia e Teolojia da Universidade Católica, Widya Mandala- Kupang, Indonézia, tinan 1999-2001 Ano Pastoral no Semináriu menór de Balide.
Iha tinan 2001-2004 kontinua estudu Teolojia no Instituto Superior de São Alberto Magno Évora-Faculdade de Teolojia da Universidade Católica Portuguesa no tina 2014-2017 estudu iha Licenciado da Teologia Dogmática na Universidade pontifícia Urbaniana – Roma.
Dom Leandro Alves simu ordena sacra hosi tinan-2004 too 2005 nu’udar Pastoral iha Paróquia Turiscai, tinan-2005 simu ordenasaun Diakonál no simu ordenasaun saserdotál iha loron-8 dezembru tinan-2006.
Antes eleitu sai Bispu Dioseze Baucau, Dom Leandro Maria Alves halao knar nuudar Vigáriu Parokiál Katedrál Dili to’o tinan-2007, tinan 2008-2011 sai nu’udar Perfeitu disiplina iha Seminário maior São Pedro e Sao Paulo Fatumeta, Dili.
Tinan 2009-2014 nu’udar diretór da fundasaun São Paulo da Dioseze Dili, tinan 2009-2014 nu’udar Diretór ezekutivu CONECTIL, hosi tinan 2010-2012 sai sekretàriu konsellu presbiteral Diocese de Dili, tinan 2011-2014 reitór semináriu menor Nossa Senhora de Fátima – Dili.
Hosi tinan 2011-2014 eleitu nu’udar Diretór Eskola Sekundária Katólica Nossa Senhora Fátima – Balide, tinan 2017- 2018 sai Vigário Paroquial da Paróquia Catedral de Dili, tinan 2018-2023 asume nu’udar Sekretáriu Ezekutivu konferensia episcopal Timorense (CET).
Tinan-2023 sai padre Paroku Parókia Katedrál, Dili no ikus-mai eleitu ba Bispu Dioseze Baucau iha loron 26 abril 2023 hosi Papa Francisco I no loron 21 jullu tinan 20023, ordenadu nu’udar Bispu Diioseze Baucau.
Notisia relevante: Prezidente Repúblika konsidera papél Igreja importante iha Timor-Leste
Jornalista : Natalino Belo
Editór : Evaristo Soares Martins
