iklan

BAUCAU, HEADLINE, MUNISÍPIU, SOSIEDADE SIVĺL

Prezidente Repúblika konsidera papél Igreja importante iha Timor-Leste

Prezidente Repúblika konsidera papél Igreja importante iha Timor-Leste

Bispu Dioseze Baucau, Dom Leandro Maria Alves. Imajen Tatoli/ Natalino Belo.

BAUCAU, 21 jullu 2023 (TATOLI) – Prezidente Repúblika konsidera papél Igreja importante hodi kontribui ba prosesu konstrusaun estadu Timor-Leste nian.

Prezidente Repúblika, José Manuel Ramos Horta, hato’o felisitasaun ne’e liuhosi serimónia ordenasaun episkopál no toma pose Bispu Dioseze Baucau, Dom Leandro Maria Alves ne’ebé realiza iha Igreja Katedrál, Vila Antiga, sesta ne’e.

Xefe estadu konsidera loron ohin festa populár ba timoroan hotu, konviksaun relizioza hotu iha Timor-Leste simu ho kontente Bispu Dioseze Baucau foun, Dom Leandro Maria Alves no hakraik aan ba memoria saudozu Bispu Dioseze Baucau dahuluk, Dom Basílio do Nascimento, padre no madre hotu.

“Igreja Katólika mak kontinua kontribui iha tinan atus ba atus formasaun Timor nia istória, relijiaun omojénea, identidade kultura, dignidade Timor-Leste nian iha mundu,” Prezidente Repúblika, ko’alia iha Igreja Katedrál, Vila antiga.

Horta argumenta, misaun todan iha Bispu Leandro Alves nia kabas tanba kontinua misaun evanjellu kristaun, hametin kultura identidade nasionál, rekonsialiasaun no dame.

Misaun seluk mak hametin fraternidade umana, igualidade jéneru, feto-mane direitu hanesan, hadomi oan sira, defisiénsia no nesesidade espesiál, kontinua kontribui ba setór edukasaun, formasaun morál, étika, umanista no siénsia.

Estadu no governu sei kontinua misaun tuir konstitusaun RDTL, liuliu hamutuk ho Igreja atu serbí povu iha aspeitu hametin unidade, dame, rekonsialiasaun, promove iha setór edukasaun, saúde no polítika ne’ebé di’ak atu kombate hamlaha, má-nutrisaun no kiak iha rai-laran.

“Parabéns ba povu Baucau ne’ebé hetan oan-ida atu serbisu nu’udar Bispu iha Dioseze Baucau,” José Ramos Horta akresenta.

Notísia relevante: Dom Leandro Alves sei haka’as atu saran-aan ba sarani iha Dioseze Baucau

Jornalista    : Natalino Belo 

Editór           : Evaristo Soares Martins 

iklan
iklan

Leave a Reply

iklan
error: Content is protected !!