BAUCAU, 21 jullu 2023 (TATOLI) – Prezidente Konferénsia Episkopál Timorense (CET, sigla portugés) Dom Noberto do Amaral fiar Bispu Dom Leandro Maria Alves sei tau matan ba sarani iha Dioseze Baucau.
Prezidente CET atúal Bispu Dioseze Maliana, Dom Noberto do Amaral, esplika, ohin Igreja Timor-Leste espesiál igreja Baucau soi duni atu hahí no hanai Maromak ba grasa boot episkopál ne’ebé monu ba Dom Leandro Alves.
“Dom Leandro ho haraik-aan no simplesidade, ha’u fiar katak sei lori no tau matan didi’ak sarani sira iha Dioseze Baucau,” Prezidenti CET hateten iha Igreja Katedrál, Vila Antiga, sesta ne’e.
Grasa ne’e sarani Dioseze Baucau hein durante tinan-ida resin nune’e ohin konsege realiza no sai-sasin ba serimónia lulik ba lala’ok boot fiar katólika nian.
Dom Noberto Amaral fiar saudozu Bispu Dioseze Baucau dahuluk Dom Basilio do Nascimento iha lalehan haksolok hamutuk iha loron istóriku ne’e liuliu ba selebarasaun festa fiar ida-ne’e.
“Sarani Dioseze Baucau oan hotu, imi soi no lolo-liman duni hodi agradese ba buat kmanek ne’ebé nai Maromak halo, orasaun durante ne’e Maromak fó ona resposta,” Dom Noberto Amaral akresenta.
Bispu Maliana konsidera Dom Leandro Alves nu’udar kafé muda Ermera ne’ebé monu iha rai Baucau fatuk-laran hodi transforma ba kulugisa (kulu-tunu) ne’ebé sei buras no soe sanak atu hamahan Dioseze Baucau inklui lori matak-malirin ba sarani sira hotu.
Prezidente CET Dom Noberto Amaral hatoo ba kleiru, padre, madre no sarani Dioseze Baucau atu simu Dom Leandro Alves no hamatan ho di’ak, la’o hamutuk atu hamahan no bali sarani sira.
Notísia relevante: Obidiente no respeitozu nu’udar xave ba susesu Bispu Leandro Alves
Jornalista : Natalino Belo
Editór : Evaristo Soares Martins
