DILI, 21 jullu 2023 (TATOLI)–Ministru Administrasaun Estatál (MAE), Tomás Cabral, hateten Uma Kbiit Laek (UKL) ka Uma Naroman Ba Povu (UNP) ne’ebé monu naksobu iha Ainaro kauza hosi dezastre natural ne’e, agora sei iha prosesu investigasaun nia laran.
Notísia Relevante: Claudinha: “Ami prontu konstrui fali UNP ne’ebé aat tanba dezastre naturál”
“UNP ne’e sei iha investigasaun tanba konstrui uma la uza besi iha sinta ne’e mak monu. Tanba ne’e, sei iha investigasaun ba ne’e,” Governante ne’e hateten ba Agência Tatoli, iha Santa Cruz, kinta ne’e.
Tanba ne’e, nia dehan, Programa Nasionál Dezenvolvimentu Suku (PNDS) no Uma Naroman ba Povu (UNP) mós tenke para, tanba laiha signifikante ida ba povu maibé importante mak iha uma ida ba povu hodi hela ne’e.
Antes ne’e, Diretora Sekretariadu Tékniku Programa Nasionál Dezenvolvimentu Suku (PNDS), Claudinha Soares Pinto, hateten Uma Naroman ba Povu (UNP) ne’ebé hetan estraga hosi dezastre natural, hein desizaun superiór no ekipa tékniku PNDS prontu atu konstrui fali uma foun ba uma ne’ebé naksobu.
“Ami prontu atu konstrui fali foun ba uma ne’ebé mak aat ona hanesan iha munisipiu Ainaro nian. Maibé, ha’u atu dehan ba komunidade hotu-hotu katak polítika halo uma ba povu ne’e, ita konstrui iha uma tuan nia fatin. Ne’e, hatudu fatin ne’e seguru no di’ak ba uma mak ita harii, agora ikus dezastre naturál dehan fali materiál laiha kualidade. Molok halo uma, ita identifika uluk fatin katak la halo iha ai-hun boot nia okos, iha foho lolon, mota no tasi ninin sira, inklui rai ne’ebé haree la seguru ka risku ba rai halai. Iha matadalan hateten klaru ona, ” nia dehan.
Maibé, nia dehan, ho dezastre natural ne’e PNDS sei responsabiliza ba estagu sira-ne’e, tanba teknikamente uma ne’ebé monu ne’e la reprezenta uma rihun ida mak kualidade la di’ak, tanba kualidade ne’e PNDS sempre garante tanba la’o tuir matadalan ne’ebé iha.
“Daudaun ne’e, ami-nia ekipa foti dadus no halo levantamentu hodi informa ba parte superiór sira katak ida-ne’e afeta hosi dezastre natural,” nia hateten.
Jornalista : Osória Marques
Editór : Cancio Ximenes
