Xanana no Nong Rong hasoru malu hakarak estabelese kooperasaun iha área hotu
DILI, 21 jullu 2023 (TATOLI)–Ministru Adjuntu Negósiu Estranjeiru Xina, Nong Rong, hasoru malu ho Primeiru-Ministru (PM), Kay Rala Xanana Gusmão, hodi ko’alia kona-ba kooperasaun sira ne’ebé sei hala’o iha tempu sira tuir mai.
“Ami ko’alia área lubuk ida, ne’e maka Vise-Ministru husu katak karik bele iha tempu, bele asina akordu ruma ba kooperasaun tinan-lima ne’ebé akumula hotu área sira-ne’e,” PM Xanana hateten hafoin reuniaun ho Vise-Ministru Nong Rong, iha Gabinete Fronteira Marrítima, Palásiu Governu, sesta ne’e.
Notísia relevante : PPN-Enkarregadu Embaixada Xina diskute relasaun bilaterál
Xefe Governu dehan, antes ne’e Vise-Ministru hasoru malu ona ho Prezidente Repúblika, José Ramos Horta hodi ko’alia kona-ba kooperasaun durante ne’e entre país rua.
“Sira (Xina) akompaña ita-nia situasaun polítika no hatene katak foin daudaun mak aprova programa, no sira hatene katak fulan sira mai ita servisu maka’as, ne’e duni informa katak Prezidente Repúblika sei hala’o vizita bá Xina iha fulan-setembru tinan-ne’e hodi hasoru malu ho Prezidente Xina,” nia akresenta.
Biban hanesan, Vise-Ministru, Nong Rong, kontente bele hasoru malu ho Primeiru-Ministru, Xanana Gusmão.
“Ami na’in-rua Primeiru-Ministru Xanana diskute kona-ba área kooperasaun entre país rua,” nia tenik.
Iha reuniaun ne’e, Primeiru-Ministru hetan akompañamentu hosi Ministru Negósiu Estranjeiru no Kooperasaun Timor-Leste, Bendito Freitas.
Jornalista : Antónia Gusmão
Editora : Julia Chatarina
