VIQUEQUE, 22 jullu 2023 (TATOLI)—Ministériu Agrikultura no Peska (MAP) destaka ona ekipamentu pezadu iha postu administrativu Uatucarbau hodi normaliza irrigasaun Irabere, Buidubu no Lawadare ne’ebé foin lalais mota estraga hafoin inundasaun.
“Horiseik ha’u haree normaliza ona irrigasaun iha parte Lawadare, ne’ebé bee tama fali ona ba natar laran, nune’e ekipamentu kontinua normaliza irrigasaun Baidubu maibé seidauk hotu,” Koordenadór Extensionista hosi postu Uatucarbau, Fernando da Silva, informa ba Agência Tatoli, iha postu Uatucarbau, sábadu ne’e.
Notísia relevante : Irrigasaun Irabere kotu, labele fornese bee ba natar ektare 70 iha Uatucarbau
Enkuantu, irrigasaun parte Baidubu ramata ona no ekipamentu sei destaka ba irrigasaun Irabere hodi halo normalizasaun tanba irrigasaun ne’e foin lalais loron 27 juñu 2023 monu tiha no bee la halai ba natar laran.
“Agrikultór sira iha Irabere foin lalais ne’e ho inisiativa tau de’it kalen ba irrigasaun hodi bele fornese bee ba natar tanba daudaun ekipamentu halo normalizasaun ba irrigasaun Buidubu,” nia akresenta.
Irrigasaun Irabere kotu fó impaktu ba atividade agrikultura iha suku Irabin de Cima, hare ne’ebé kuda hotu ona maibé ekipamentu iha ona postu Uatucarbau.
Irrigasaun Irabere fornese bee ba natar ektare 70 iha aldeia lima iha suku Irabin de Cima, ho totál populasaun 1.000 resin hosi uma-kain pur volta 573.
Nune’e mós, irrigasaun Baidubu no Nahabo iha postu Uatucarbau, fornese bee ba natar ektare 64.
Jornalista : Vitorino Lopes da Costa
Editora : Julia Chatarina
