DILI, 24 jullu 2023 (TATOLI)—Autoridade Inspesaun no Fiskalizasaun Atividade Ekonómika Sanitária no Alimentár, Institutu Públiku (AIFAESA, I.P) hamutuk ho Polísia Nasionál Timor-Leste (PNTL) halo atividade inspesaun ba produtu tabaku iha merkadu Taibesi no identifika negosiante balun kontinua fa’an tabaku ilísitu.
Sub-Inspetór Jerál AIFAESA, I.P, Dionísio Neto da Silva, hateten, asaun ne’ebé sira halo ho objetivu atu asegura tabaku ilísitu ne’ebé daudaun ne’e kontinua sirkula iha merkadu nasionál.
“Ohin ita mai merkadu Taibesi hodi halo inspesaun ba produtu tabaku balun ne’ebé ita-nia Governu la autoriza atu komersializa iha merkadu tuir dekretu-lei 14/2016 kona-ba rejime kontrolu tabaku ne’ebé bandu ka la permite negosiante sira kontinua fa’an tabaku ilísitu sira ne’e,” Sub-Inspetór Jerál dehan iha Merkadu Taibesi, segunda ne’e.
Notísia relevante : AIFAESA, I.P deteta produtu liu prazu no tabaku ilísitu durante halo inspesaun
Hosi inspesaun ne’e, ekipa konsege halo apreensaun ba produtu hamutuk 181, kompostu hosi slop 37, masu 93, no plástiku 51.
“Tabaku sira ne’ebé ita halo apreensaun mak hanesan Surya 12, L.A mutin, Malboro, no seluk tan, ne’ebé nia finalidade sei halo destruisaun iha Tibar,” nia akresenta.
Biban ne’e, Dionísio Neto da Silva, husu ba operadór ekonómiku, liu-liu negosiante sira ne’ebé halo negósiu, tenke koopera no kumpre lei atividade ekonómika tanba iha dekretu-lei númeru 14/2016 kona-ba rejime kontrolu tabaku nian bandu labele komersializa tan tabaku ilísitu iha merkadu.
“Ha’u lori AIFAESA, I.P nia naran husu operadór ekonómiku sira bainhira atu fa’an sasán tenke haree ida ne’ebé lei permite mak fa’an, lei la permite labele fa’an tanba ida ne’e konsidera irregularidade no sei prosesa tuir lei,” nia fó hanoin.
Jornalista : Arminda Fonseca
Editora : Julia Chatarina
