DILI, 24 jullu 2023 (TATOLI)—Autoridade Inspesaun no fiskalizasaun Atividade Ekonómika Sanitária no Alimentár, Institutu Públiku (AIFAESA, I.P) husu públiku atu halo keixa bainhira haree operadór ekonómiku ka negosiante sira komete irregularidade hanesan hasa’e presu sasán la tuir lei.
“Ami-nia parte kontinua halo inspesaun ba folin sasán iha Dili no munisípiu sira, maibé ho difikuldade no limitasaun rekuru umanu no ita-nia servisu deskonsentrajen iha munisípiu seidauk iha inklui fatin balun seidauk to’o halo inspesaun, maka bainhira operadór ekonómiku komete atividade irregularidade, husu atu públiku sira hato’o informasaun mai AIFAESA, I.P nune’e ami bele prosesa tuir lei ne’ebé iha,” Sub-Inspetór Jerál AIFAESA, I.P, Dionísio Neto da Silva, hateten iha merkadu Taibesi, segunda ne’e.
Notísia relevante : Komunidade Fatululik preokupa presu foos $16 sa’e ba $20
Daudaun ne’e, públiku kestiona, negosiante iha munisípiu hasa’e folin sasán, hanesan foos hosi presu $16 sa’e ba $20.
“Hosi informasaun sira ne’ebé iha, AIFAESA, I.P presiza evidénsia hodi haforsa asaun. Ami sei rekolla lai informasaun tanba asaun ne’ebé ami halo ne’e, la’o tuir lei, bainhira laiha evedénsia ita labele foti uluk kestaun ba públiku tanba misaun ami-nian ne’e klaru atu proteje konsumidór sira no promove konkorénsia reál entre operadór ekonómiku sira,” nia akresenta.
Nia dehan, durante AIFAESA, I.P halo inspesaun ligadu ho presu sasán iha merkadu, identifika duni presu balun sa’e maibé la maka’as, sa’e tuir lei permite hela tanba bainhira taxa sa’e hahú hosi 2,5% ba 5%, entaun ninia impaktu ne’e ba presu produtu sira hotu.
“Konsumidór sira hosi munisípiu bainhira identifika iha loja ruma ka supermarkadu sira hasa’e folin sasán tenke hato’o keixa ba AIFAESA, I.P,” Sub-Inspetór Jerál fó hanoin.
Jornalista : Arminda Fonseca
Editora : Julia Chatarina
