VIQUEQUE, 24 jullu 2023 (TATOLI)—Diretór Servisu Edukasaun munisípiu Viqueque, Domingos Brandão, hateten, estudante na’in-200 ne’ebé asesu ba programa bolsa méritu seidauk kompleta dokumentu.
“Ami identifika iha estudante na’in-200 mak seidauk kompleta dokumentu hanesan loke konta bankária, hela semana ida to’o 31 jullu taka ona. Ha’u haree estudante sira falla trata dokumentu iha Resjistu Sivil, sertidaun moris no Bilhete de Identidade, tanba ne’e maka estudante sira barak mak seidauk halo sira-nia dokumentu,” Diretór Servisu Edukasaun munisípiu Viqueque, hateten iha ninia knaar fatin, Beloi, segunda ne’e.
Notísia relevante: Kestaun trata dokumentu prejudika estudante na’in-439 iha Viqueque asesu bolsa méritu
Bainhira fulan ne’e ramata maka estudante sira seidauk kompleta dokumentu maka sei la hetan direitu ba bolsa méritu.
“Tanba ne’e ami daudaun kontinua hein estudante sira-nia dokumentu. Tuir orientasaun Diretór Jerál Ensinu hosi Ministériu Edukasaun katak semana oin taka ona. Nune’e ba estudante sira-ne’ebé kompleta dokumentu, sei la hetan direitu no orsamentu sei fila ba kofre Estadu. Ha’u sente bolsa ne’e sai oportunidade di’ak ba estudante sira, sira bele trata dokumentu hodi hetan diretu ne’ebé Governu oferese”, nia hato’o.
Ho nune’e, nia fó hanoin ba estudante sira-ne’ebé tama klasifikasaun tenke kompleta iha semana ne’e nia laran.
Benefisiáriu bolsa méritu hosi munisípiu Viqueque kompostu oso pasajen 4a klase, pasejen 6a klase, inklui klase 7 ano no 12 ano.
Tuir dadus, eskola asesu bolsa méritu hamutuk 232 no benefisiáriu programa hamutuk 1.163 iha Viqueque.
Governu aloka orsamentu $263.450 ba benefisiáriu hamutuk 483 ne’ebé kompleta ona dokumentu no liu ona verifikasaun, prosesa verikasaun dokumentu hamutuk na’in-480 no estudante hamutuk na’in-200 mak seidauk kompleta dokumentu.
Jornalista : Vitorino Lopes da Costa
Editora : Julia Chatarina
