DILI, 24 jullu 2023 (TATOLI) – Ministru Edukasaun Superiór, Siénsia no Kultura (MESSK), José Honório Jerónimo, informa katak IX Governu laiha planu atu kontinua Sidade Universitária Aileu, maibé sei investe maka’as iha Universidade Nasionál Timor Lorosa’e (UNTL) nu’udar instituisaun ensinu superiór públiku hodi garante kualidade estudante sira-nian.
Desizaun XI Governu nian la kontinua dezenvolve prosesu konstrusaun sidade universidade ne’e tanba konsidera la nesesária no Ezekutivu iha hanoin ona oinsá atu investe iha universidade nasionál atu prepara di’ak liután kondisaun hodi lori progresu ba alunu sira.
“Ita hapara hodi la kontinua prosesu ba Sidade Universitária Aileu ne’e la’ós desizaun ministru nian, maibé IX Governu tanba la nesesária, maibé ita iha ona hanoin atu investe ba UNTL”, José Honório reiteira asuntu ne’e ba Tatoli iha Palásiu Governu, ohin.
Nia salienta kona-ba indimnizasaun ne’ebé VIII Governu halo ona ba komunidade afetada ba grande projetu ne’e, nia konsidera lafó prejuízu ba Estadu tanba rai sira ne’e pertense ona ba Estadu no populasaun sira ne’ebé hetan ona pagamentu laiha ona direitu atu okupa rai ne’e.
“Rai sira ne’e ita sei uza hodi halo buat seluk ida. Ne’e ita-nian planu, maibé ha’u seidauk bele hatete ba públiku saida maka ita sei halo iha rai sira ne’e”, afirma.
Iha governsaun anteriór prevee tiha ona osan hamutuk millaun $2,1 ba indemnizasaun no hasai ona $1.037,987 hodi selu família 44 ne’ebé lakon uma, abitante 58 ne’ebé lakon sira-nian ai-horis no 102 ne’ebé lakon ona rai.
Rekorde katak, eis-Primeiru-Ministru, Taur Matan Ruak, lansa iha 21 dezembru 2021, futura instalasaun ba sidade universitária iha suku Lausin, postu administrátivu Aileu Vila.
Tuir planu anteriór, sidade universitária atu harii iha rai ektare 24 ne’ebé populasaun sira oferese ba Governu no haree katak Aileu lokaliza iha área estratéjika ne’ebé ema fásil atu asesu.
Antes to’o lansamentu fatuk dahuluk, konsultór internasionál, Bernabad Arquitetura, SLP iha Timor-Leste no España, halo estudu viabilidade ba sidade universitária.
Ministériu Obra Públika iha Governu Dauluk prevee orsamentu ba estudu viabilidade no dezeñu enjeñeiru detalladu ba sidade universitária ne’e hamutuk rihun $550.
Notísia relevante: MESSK husu komunidade uma kain 29 iha Aileu hakbesik-an ba Governu
Jornalista: Tomé Amado
Editora: Maria Auxiliadora
