Ministru Vivian Balakrishnan hakarak estabelese Embaixada Singapura iha Dili

DILI, 24 jullu 2023 (TATOLI)–Primeiru-Ministru, Kay Rala Xanana Gusmão, segunda ne’e, simu vizita kortezia Ministru Negósiu Estranjeiru Repúblika Singapura, Vivian Balakrishnan, hamutuk ho delegasaun, ne’ebé iha biban ne’e Ministru Vivian hato’o intensaun atu estabelese reprezentasaun iha Dili

“Agora ami sei haree orgánika Governu nian no sei diskute Orsamentu Retifikativu, maibé hanoin kona-ba futuru depois sei iha nafatin kontaktu, sira (Singapura) mós hakarak tau Embaixada sira-nian iha ne’e (Timor), maibé molok estabelese ita sei haree fatin,” Xanana hateten iha Gabinete Fronteira Marrítima, iha Palásiu Governu.

Xefe Governu konsidera Singapura nu’udar país ne’ebé fó ezemplu di’ak ba Timor-Leste iha área lubuk ida ne’ebé bele iha partisipasaun no kooperasaun di’ak ho Singapura.

Notísia relevante : PR Horta-Ministru Estranjeiru Singapura diskute TL adere ba ASEAN

Iha biban hanesan, Ministru Vivian konsidera Xanana Gusmão nu’udar amigu Singapura nian no komprometidu apoia Timor-Leste nia adezaun ba Asosiasaun Nasaun Sudeste Aziátiku (ASEAN, sigla portugés).

“Xanana ema ida ne’ebé ita admira no respeita, nia mak ema ne’ebé luta ba independénsia nasaun ida-ne’e, nasaun ida-ne’e sei hola parte iha ASEAN hanesan Singapura respeita tebes no hakarak servisu hamutuk iha futuru,” Ministru dehan.

Nia nota katak, Prezidente Repúblika, Ramos Horta no Xanana Gusmão iha hanoin no planu di’ak ba dezenvolve Timor.

“Hau hanoin hikas fali governasaun ida-ne’e foin la’o loron 24, maibé ha’u hateten ba imi, ha’u hasoru ona Primeiru-Ministru Xanana dala-lima ona, sura ho iha rai-li’ur no iha ne’e hodi hatudu ba ita-boot sira servisu saida de’it mak sei hala’o durante tinan-lima nia laran. Nune’e Primeiru-Ministru fiar ba ami-nia apoia tomak ba imi-nia ajenda no programa, espera buat di’ak liu ba ita no ba ita-nia ema sira,” nia akresenta.

Iha enkontru ne’e, Xefe Ezekutivu akompaña hosi Ministru Negósiu Estranjeiru no Kooperasaun, Bendito Freitas, no Embaixadora Timor-Leste iha Singapura, Maria Natália Viegas Carrascalão, enkuantu Ministru Negósiu Estranjeiru Singapura akompaña hosi Embaixadór Repúblika Singapura ba Timor-Leste naun rezidentente, Robin Hu no membru delegasaun sira.

Daudaun ne’e, iha embaixada 17 maka rezidente iha Dili hanesan maka Austrália, Repúblika Federativa Brazíl, Brunei Darusalam, Repúblika Populár Xina, Repúblika Kuba, Uniaun Europeia, Repúblika Indonézia, Japaun, Koreia, Malázia, Nova Zelándia, Repúblika Filipina, Portugal, Repúblika Árabi Saaraui Demokrátika, Santa Sé, Tailándia no Estadu Unidu Amérika.

Jornalista     : Antónia Gusmão

Editora          : Julia Chatarina