PN husu Governu normaliza urjente estrada Lolotoe ba Bobonaro

DILI, 24 jullu 2023 (TATOLI)—Deputadu hosi bankada FRETILIN iha Parlamentu Nasionál (PN), José da Crus, husu ba Governu aselera atu normaliza urjente estrada ne’ebé kotu iha postu administrativu Lolotoe ba munisípiu Bobonaro, ne’ebé afeta hosi dezastre naturál iha semana hirak liu ba.

Notísia Relevante: IGEADE, I.P normaliza ona estrada Zulo ba Bobonaro

“Semana rua liu ba, ha’u aprezenta ona kona-ba postu administrativu Lolotoe nia situasaun ne’ebé mak iha fulan ida-ne’e nia laran hetan afeta hosi dezaste natural, maibé to’o agora seida’uk iha normalizasaun ba estrada ne’ebé kotu,” nia levanta liuhosi reuniaun plenária PN, segunda ne’e.

Situasaun ne’e prejudika tebes komunidade iha área ne’eba, tanba daudaun ne’e sira labele hetan sasán nesesidade bázika hosi munisípiu Maliana tanba kondisaun estrada grave totál.

Tuir nia, ekipamentu pezadu hosi parte Institutu Jestaun Ekipamentu no Apoiu Dezenvolvimentu Infraestrutura, Institutu Públiku ((IGEADE, I.P) iha ona fatin refere, maibé ekipamentu iha ida ka rua de’it entaun labele halo serbisu ho másimu.

“Tanba ne’e, husu ministériu relevante atu haree situasaun rapidamente númeru ekipamentu pezadu ne’e oinsá halo normalizasaun konetividade estrada hosi postu mai munisípiu, tanba situasaun ne’e susar mós bele apoiu vítima sira-ne’ebé mak foin daudaun afeta ba dezastre natural. Iha dadus ne’ebé asesu, iha uma-kain barak ona mak hetan apoiu no uniku postu Lolotoe de’it mak seidauk hetan apoiu emerjénsia ruma,” nia dehan.

Deputadu CNRT, Marcos Xavier, sekunda kona-ba estrada Lolotoe ne’ebé kotu hosi loron 03 jullu to’o agora, difikulta komunidade hosi fatin ne’eba labele asesu hodi halo movimentu ba-mai kapitál Maliana.

“Iha duni ekipamentu IGEADE, I.P destaka iha ne’eba, sira dudu duni estrada maibé ekipamentu balun sira dada tiha fali tau iha suku Lour. Tuir loloos ne’e, sira finaliza tiha para komunidade iha ne’eba bele mai iha kapitál Maliana, depois mak sira muda ekipamentu maibé kontráriu fali seidauk hotu maibé muda. Hanoin sira-nia mekanizmu ladún di’ak, husu ba Ministériu Obra Públika ho IGEADE, I.P toma atensaun presiza normaliza lalais, tanba ligasaun hosi postu mai kapitál (Maliana),” nia hateten.

Deputada CNRT, Carminda Carlota, hato’o mós preokupasaun kondisaun estrada iha munisípiu Bobonaro liuliu postu  Lolotoe ho Bobonaro, tanba situasaun ne’e afeta tebes iha semana ida liu ba  liuliu populasaun Lolotoe lori mate-isin kuaze kilómetru neen hodi ba iha Lolotoe vila.

Ho kondisaun Estrada aat ne’e, afeta tebes ba populasaun iha ne’eba hodi rezultadu folin foos iha merkadu sa’e makaas tanba foos kilograma 20 ne’ebé uluk faan ba $16 ne’e agora sa’e ba $20, no kilograma 30 uluk ho folin $20 ne’e agora sa’e ba $24.

“Komunidade iha fatin ne’eba mós informa katak, mákina IGEADE, I.P ne’ebé durante hala’o serbisu iha ne’eba agora aat hela, hodi nune’e lori fila tiha ba Maliana. Maibé, estrada iha parte dalan atu tun ba Lolotoe vila seidauk normaliza hikas no komunidade labele asesu dalan ne’e hodi bele transporta sira-nia sasán sira ba-mai munisípiu Bobonaro no munisípiu Suai,” nia hateten.

Entretantu, iha suku Lolotoe mós ita iha uma kain 32 mak afeta tebe-tebes ba estrada aat ne’e difikulta populasaun labele viajen ba-mai/

Iha parte seluk, tuir nia, iha suku Moro mós hanesan liña eletrisidade mate to’o agora la lakan no iha ai-riin 12 mak monu iha ne’eba, to’o agora EDTL postu Bobonaru seidauk ba hadi’a,” nia dehan.

Prezidente Parlamentu Nasionál, Maria Fernanda Lay, hateten hanoin situasaun ne’e hosi parte Governu sei haree iha Orsamentu Retifikativu sei bele kria kondisaun, no nia-parte husu komisaun trata asuntu Infraestrutura iha PN atu halo mós fiskalizasaun.

“Hein katak, Governu bele distribui mós apoiu emerjénsia ba família sira-ne’ebé seidauk hetan apoiu umanitáriu,” nia hateten.

Jornalista : Nelson de Sousa

Editór        : Cancio Ximenes