Marsa diversidade iha Oé-Cusse hodi promove identidade LGBTI ba sosiedade
OÉ-CUSSE, 25 jullu 2023 (TATOLI) – Grupu komunidade LGBTI (Lesbian, Gay Biseksual Transjender Interseksuál ) tersa ne’e selebra fulan praid (sigla ingles) ka fulan orgullu ho marsa diversidade ho objetivu atu promove identidade ema LGBTI ba sosiedade sira iha Rejiaun Administrativa Espesiál Oé-Cusse Ambeno (RAEOA).
Atividade marsa diversidade ne’e, organiza hosi Gabinete Prezidente Autoridade RAEOA liuhosi Unidade Promosaun Igualdade Jéneru no Inkluzaun Sosiál, ne’ebé hahú hosi rotunda Santa-Roza to’o Oésono liuhosi bairru Krus no Hospitál Referál Oé-Cusse to’o kampu desportiva Sikluli.
Prezidente Autoridade RAEOA, Arsénio Paixão Bano, konsidera marsa diversidade ne’e atu fó hanoin ba joven no ema hotu, atu respeita malu, liuliu maluk LGBTI.
“Komemorasaun ba eventu ne’e hodi manifesta komunidade LGBTI nia identidade no hatudu mós katak, LGBTI eziste ona iha Timor-Leste, espesialmente iha Oé-Cusse Ambeno,” Arsénio Paixão Bano, ko’alia hafoin ensera selebrasaun fulan praid iha Oé-Cusse.
“Ha’u reprezenta Autoridade RAEOA hakarak agradese ba ita hotu, ne’ebé maka mai asiste marsa orgullu nian fulan Praid, ne’e importante ba RAEOA no Timor-Leste, atu fó hanoin no fanu ba ema hotu kona-bá inkluzaun ema hotu iha prosesu tomak ba dezenvolvimentu inklui komunidade LGBTI,” nia orgullu.
Arsénio Bano, informa, to’o agora seidauk iha organizasaun ida kona-bá komunidade LGBTI iha inisiativa atu harii organizasuan ida iha Oé-Cusse, atu-bele promove atividade ne’e tanba ita hakarak loke Oé-Cusse ne’e ba ema hotu.
“Ha’u hakarak dudu organizasaun hanesan CODIVA, maske nia baze iha Díli, maibé ita-nia maluk sira iha Oé-Cusse, sira-bele harii organizasaun ida, laiha problema, ha’u labele harii ba sira, maibé sira rasik mak tenki harii, nune’e sira-bele kontrola rasik sira-nia organizasaun ne’e, no bele dezenvolve an tanba sira-nia kontribuisaun barak,” nia fó hanoin.
Koordenadoor Fundasaun Coalition for Diversity and Action (KODIVA), iha Oé-Cusse, Paula Martins, ne’ebé trata asuntu kona-bá prevensaun moras HIV-AIDS, agradese b aba komunidade RAEOA tanba prezensa komunidade LGBTI iha sosiedade, durante ne’e iha kooperasaun di’ak oinsa luta prevene moras hodi kontribui ba dezenvolvimentu.
“Ha’u hanoin iha Oé-Cusse la’ós 100% maibé iha Oé-Cusse ita-bele dehan 95% ne’e livre hosi diskriminasaun ba ami nu’udar LGBTI, hahú husi sub-rejiaun sira, ha’u seidauk rona liafuan diskrimina ami, ida-ne’e orgullu bo’ot mai ami, no agradese ba populasaun sira iha Oé-Cusse, tanba durante ne’e iha kooperasaun di’ak oinsa kontribui ba prosesu dezenvolvimentu iha RAEOA,”
Hola parte iha eventu marsa diversidade ne’e, maihosi Autoridade RAEOA, PNTL no F-FDTL, kargu xefia sira PDHJ, sosiedade sivíl no estudante sira.
Notísia relevante: RAEOA selebra fulan Praid ho LGBTI ‘hakuak no respeita diversidade’
Jornalista: Abílio Elo Nini
Editór: Evaristo Soares Martins
