DILI, 26 jullu 2023 (TATOLI)—Ministru Administrasaun Estatál (MAE), Tomás Cabral, hateten Autoridade Munisípiu Dili (AMD) presiza normaliza kondisaun semitériu santa cruz tanba laiha espasu atu ema la’o ba-mai iha semitériu laran.
Notísia Relevante: PM Portugál sei vizita fatin istóriku Semitériu Santa Cruz
Tanba, nia hatutan, iha semit’eriu santa cruz ne’e la’ós timoroan de’it mak hakoi iha fatin refere maibé ema Portugal no Indonézia mós hakoi iha semotériu ne’e.
”

Entaun, ita organiza fali fatin ne’e halo di’ak sai fali jardin ida hodi ema mai vizita. Agora ema mai vizita hela de’it maibé kondisaun ladi’ak, entaun oinsá. Ema atu tama ba laran de’it ladi’ak, entaun Governu hanoin finansia atu hadi’a fatin sira-ne’e,” Tomas Cabral hateten ba jornalista sira, hafoin vizita semitériu no monumentu 12 Novembru iha Santa Cruz, kuarta ne’e.
Tanba, nia dehan, realidade vizitante mai vizita fatin ladun di’ak no ida-ne’e presiza hadi’a no normaliza fali.
“Ohin, ita-nia Primeiru-Ministru mai fó omenajen ba ita-nia luta na’in sira liuliu sira-ne’ebé fó sira-nia vida ba rai ida-ne’e. Atu hetan indenpendénsia la’ós fasil entaun, ohin, sira mai hakarak fó omenajen. No, sira mai atu haree situasaun rai lulik, tanba iha Portugáal semitériu sira, Câmara jere maibé iha ne’e Administrasaun Munisipál mak jere, maibé ladún di’ak. Tanba ne’e, ha’u iha Sekretáriu Estadu ida hodi halo tratamentu ba fatin ne’e,” nia dehan.
Governante ne’e dehan, fatin ida-ne’e mak presiza hadi’a no fatin ida tan mak iha tasi ibun Bidau Santana nian ne’e tanba fatin rua ne’e mak iha istória barak, nune’e liuhosi vizita ne’e halo kooperasaun liuliu fó formasaun ba joven timoroan sira, atu halo calçada Portugeza nune’e iha diferensa uitoan
Tanba ne’e, nia dehan, Sekretáriu Estadu ida iha Ministériu Administrasaun Estatál (MAE) nian sei kolabora no servisu hamutuk ho Komité 12 Novembru, ne’ebé sei reorganiza fatin ida-ne’e sai di’ak-liu.
“Tanba mate iha ne’e Indonézsia nian mós hakoi iha ne’e, ema sei la mai foti entaun ita presiza halo istória ida nune’e ema mai vizita mós. Entaun, ami hakarak atu koordena malu hodi oinsá normaliza fali fatin ne’e. Tanba se lae aban bainrua jerasaun foun lahatene fatin istoriku sira. Munisípiu Dili presiza normaliza fali fatin ne’e,” nia hateten.
Prezidente Komité 12 Novembru, Gregório Saldanha, hateten sente onradu ba visita Primeiru-Ministru Portugál nian tanba vizita ida-ne’e hanesan omenajen ida espesialmente ba joven sira-ne’ebé luta terminante iha tinan 1991.
“Hosi ne’e hametin liután kooperasaun Portugál nian mai ita, la’ós de’it iha momentu funu de’it. Maibé, presiza apoiu dezenvolvimentu nasionál nune’e bele fortifika ita-nia relasaun ne’e,” Prezidente Komité 12 Novembru ne’e hateten.
Nia hateten, vizita ne’e importante tebes mai Timor-Leste nune’e liuhosi ne’e bele hametin liután future entre nasaun rua ne’e.
Iha vizita ne’e, Primeiru-Ministru Portugál akompañia hosi Ministra Traballu Solidariedade no Seguransa Sosiál Portugál, Ana Mendes Godinho, embaixadora Portugal iha Timor-Leste, ho nia ekipa tomak hamutuk ho MAE, Vise MAE, Jacinto Rigoberto, Sekretáriu Estadu Asuntu Toponomia no Organizasaun Urbana, Germano Santa Brites, ho nia ekipa.
Jornalista : Osória Marques
Editór : Cancio Ximenes