ANAAA halo avaliasaun ba kursu Empreendedorizmu iha UNPAZ
DILI, 26 jullu 2023 (TAOLI) – Ajénsia Nasionál Avaliasaun no Akreditasaun Akadémika (ANAAA) avalia ona kursu emprendedorizmu iha Fakuldade Ekonomia iha Universidade da Paz (UNPAZ).
Diretór-Ezekutivu ANAAA, Nílton Paiva, hatete avaliasaun ne’ebé ajénsia halo dahuluk ba kursu empreendedorizmu ne’e, nia avaliadór sira husi internasionál no nasionál. Atividade realiza tanba kursu ne’e hetan ona lisensa operasionál iha tinan rua liubá.
Nílton Paiva dehan avaliasaun ida ne’e sai hanesan jornada foun ida hafoin Timor-Leste enfrenta covid-19 ne’ebé halo atividade labele la’o ho di’ak.
“Prosesu akreditasaun ne’e atu haree progresu saida maka kursu ne’e atinje ona. Avaliasaun no akreditasaun ne’e la’ós atu halo julgamentu, maibé atu haree didi’ak to’o iha ne’ebé ona dezenvolvimentu husi kualidade kursu ne’e rasik”, dirijente afirma iha Balide, ohin.
Responsavel ne’e esplika katak prosesu avaliasaun ba kursu ida normalmente demora loron rua. Loron dahuluk avaliadór sira sei uza tempu hodi halo entrevista ho reitór universidade iha Instituisaun Ensinu Superiór Públiku no Privadu sira, dekanu, xefe departamentu, dosente, estudante no antigu alunu sira. Iha loron daruak maka sei halo vizita hodi haree ekipamentu saida de’it maka kursu sira ne’e instala ona.
Husi rezultadu loron rua nian sei junta hamutuk, bainhira hatudu katak presiza hadi’a, entaun avaliadór sira sei hato’o rekomendasaun ba universidade atu kompleta buat sira ne’ebé maka seidauk iha.
UNPAZ iha fakuldade rua mak avansa ba avaliasaun no akreditasaun mak Ekonomia ho nia departamentu Empreendedorizmu, Jestaun, Bankária no Akuntabilidade. Ba Fakuldade Tékniku ne’e maka reavalia kursu Arkitetura no Enjeñaria Sivíl.
Ministru Edukasaun Superiór, Siénsia no Kultura, José Honório Jerónimo, konsidera katak avaliasaun ba kursu empreendedorizmu ne’e pertinente atu hetan akreditasaun hodi garante ninia kualidade.
Tuir nia, bainhira ajénsia reguladora la halo kontrolu ba ensinu superiór ho nia kursu sira ne’ebé enkaixa iha kada fakuldade maka edukasaun iha Timor-Leste ne’e bele sai pontu interrogativu.
Rekorde katak ANAAA lansa iha, marsu ne’e, avaliasaun inisiál ba Institutu Boaventura Timor-Leste no kursu 30-resin ba universidade públika no privada. Hafoin lansamentu, programa akreditasaun ne’e foin realiza entre jullu to’o outubru 2023, ba UNPAZ, UNDIL, UNITAL, IOB, DIT, ICSP Baucau, ISC, ETCI no IPB.
Governante ne’e espera katak programa avaliasaun no akreditasaun ba kursu 30 ne’ebé ANAAA planeia ona iha tinan ida ne’e bele hetan susesu to’o nia rohan.
“Ha’u nafatin fó apoiu ba ANAAA nia serbisu tomak no hein katak prosesu avaliasaun no akreditasaun ba kursu 30 iha instituisaun sira bele hatudu rezultadu di’ak, liuhusi rekomendasaun sira atu nune’e bele fanu ita-nian instituisaun sira atu haka’as-aan hodi hadi’ak liután kualidade iha kursu sira”, nia garante.
Iha sorin seluk, Reitór Universidade da Paz, Adolmando Amaral, dehan kursu Empreendedorizmu UNPAZ hetan ona avaliasaun no ANAAA rekomenda atu aumenta tan parseiru (stockholder) iha kursu refere.
“Ita-nian kursu Empreendedorizmu ne’e hetan 70% di’ak tebes, maibé iha 30% maka presiza hadi’ak, liliu kona-ba kooperasaun ho parseiru sira tantu husi rai-laran nomós li’ur”.
Nia dehan kooperasaun ho stockholder sira ne’e ho intensaun atu loke espasu ba estudante finalista sira bainhira atu halo sira-nian prátika ruma karik labele hetan difikuldade, signifika UNPAZ ninia parseiru sira bele fasilita espasu atu estudante sira bele hetan oportunidade hodi kontinua aprende iha ajénsia nasionál no internasionál sira.
Notísia relevante: ANAAA sei halo avaliasaun ba kursu 10 iha DIT-ISC-ICS
Jornalista: Tomé Amado
Editora: Maria Auxiliadora
