DILI, 13 fevereiru 2023 (TATOLI)–Ajénsia Nasionál Avaliasaun Akreditasaun Akadémika (ANAAA) sei halo avaliasaun programatika ba kursu 10 iha Instituisaun Ensinu Superiór Privadu (IESP) hanesan Dili Institute of Technology (DIT), Institutu Superiór Kristál (ISC, sigla portugé) no Institutu Siénsia Saúde (ICS, sigla portugés).
Notísia Relevante: ANAAA sei avalia IBTL-universidade akreditadu ualu ho orsamentu $205.283
Reitór Dili Institute of Technology (DIT), Salustiano Piedade, hateten DIT iha kursu tolu ne’ebé sei hetan avaliasaun hosi ANAAA iha tinan ida-ne’e mak hanesan kursu Sivíl Enginering hosi Fakuldade Enginering and Sience, Kursu Enginering Pertoliu hosi Fakuldade Petroliu Estadies no kursu Jestaun Jerál hosi Fakuldade Business Management.
“Ita simu ona informasaun katak avaliasaun ne’e tuir planu sei realiza entre fulan maiu ba oin maibé ita seidauk hatene avaliasaun ba DIT nian sei realiza bainhira. Buat hotu depende ba oráriu ne’ebé mak Ajénsia Nasionál Avaliasaun Akreditasaun Akadémiku (ANAAA) mak sei termina,” Reitór DIT ne’e hateten ba Agência Tatoli iha kampus DIT, segunda ne’e.
Maibé, nia dehan, ANAAA husu ona DIT atu halo preparasaun ba dokumentu kursu tolu nian, tanba ne’e ANAAA entrega ona self assesment report mai DIT atu prenxe, depois mak ANAAA sei informa fila-fali bainhira mak sira sei mai atu halo avaliasaun.
“DIT reparadu ona atu simu avaliasaun hosi ANAAA iha momentu ne’ebé de’it,” nia hateten.
Kursu 10 ne’ebé mak eziste iha instituisaun tolu ne’e mak hanesan kursu sivíl enjinering, kursu enjinering Petroleu, kursu jestaun jerál, kursu Siénsia Biomedical e laboratorial, kursu ekonomia kontabilidade, kursu Pisikolojia, kursu kímika, kursu sosiolojia, kursu lingua ingles no mós kursu ida ba mestradu mak iha área edukasaun.
Reitór Institutu Siénsia Saúde (ICS), Domingos Soares, relata sira iha kursu foun ida iha tinan ida-ne’e sei tama mós iha avaliasaun ANAAA nian mak Siénsia Biomedical e Laboratorial (CBL).
Avaliasaun ne’ebé ANAAA sei halo ba kursu Siénsia Biomedical e Laboratorial (CBL) nian ne’e, bazea ba prosesu graduasaun ne’ebé ICS halo antes ona tanba ne’e ANAAA aproveita tempu hakarak halo kedan avaliasaun ba kursu foun refere.
“Ami simu ona informasaun hosi ANAAA katak avaliasaun ne’e sei halo iha etapa rua, tanba ne’e ami-nia kursu CBL sei hetan avaliasaun iha segundu etapa iha tinan ida mós,” nia hateten.
Reitór Institutu Cristal (ISC), Sebastião Pereira, hateten sira iha kursu lisensiatura lima no kursu programa mestradu ida mak tama iha re-akreditasaun programatika inklui avaliasaun.
Kursu lima ne’e mak ekonomia kontabilidade, kursu Pisikolojia, kursu kímika, kursu sosiolojia no kursu lingua ingles.
Enkuantu kursu ida ba programa mestradu nian ne’ebé eziste iha ISC atu hetan avaliasaun ne’e mak kursu edukasaun.
Kursu programa mestradu ne’e sei tama iha akreditasaun inisiál hosi kursu neen ne’ebé ISC rejista ne’e prepara ona atu simu avaliasaun tanba kursu sira prenxe ona rekezitu hosi ANAAA.
Notísia Relevante: ANAAA sei halo peskiza ba graduadu la asesu merkadu traballu
Jornalista : Tomé Amado
Editór : Cancio Ximenes
