DILI, 10 fevereiru 2023 (TATOLI)–Ajénsia Nasional Avaliasaun Akreditasaun Akadémiku (ANAAA) tinan ida-ne’e sei halo peskiza ba Instituisaun Ensinu Superiór Públiku no Privadu (IESPP) sira atu buka hatene tanba saida mak graduadu barak mak la asesu ba merkadu traballu indústria.
Notísia Relevante: ANAAA sei avalia IBTL-universidade akreditadu ualu ho orsamentu $205.283
“ANAAA iha inisiativa hakarak halo peskiza ka halo estudu ida-ne’e atu buka deskobre tanba saida mak kada tinan sempre akontese erru sira hanesan ne’e. Estudante barak depois gradu tiha la hetan servisu,” Diretór Ezekutivu Ajénsia Nasional Avaliasaun Akreditasaun Akadémiku, Nilton Diamantino Paiva, hateten ba Agência Tatoli iha edifísiu ANAAA Balide, sesta ne’e
Nia esplika, iha prosesu estudu ka peskiza ne’e ANAAA sei foti universidade balun atu sai hanesan painél project ida, maibé ANAAA sei involve mós dosente sira iha kada universidade atu ajuda iha prosesu ne’e, tanba servisu ne’e la’ós fasil.
ANAAA ninia hakarak halo peskiza ka estudu ba asuntu ida-ne’e tanba papél ANAAA nian hakarak garante kualidade, maibé atu ko’alia kona-ba garante kualidade ne’e pilár importante liu mak Institutu Ensinu Superiór sira nian bazea ba estandar kurríkulu.
Tuir nia, Ministériu Ensinu Superior Siénsia no Kultura (MESSK) antes ne’e kria ona padraun rasik ba kurríkulu nasionál hodi apoiu Instituisaun Ensinu Superiór Públiku no Privadu atu implementa.
Pergunta ida durante ne’e sira kumpre ka la’o tuir duni ka lae, nia dehan, ida-ne’e mak ANAAA nia planu atu halo estudu hodi haree besik liután implementasaun kurríkulu Nasionál iha kada universidade sira-ne’e.
Tanba, nia hateten, atu ko’alia kona-ba kualidade ne’e kabe ba sustentabilidade tanba nu’udar diretór nia laiha direitu ida atu halo komparasaun entre Universidade ka Instituisaun ensinu superiór ida-ninia kualidade ho sira seluk.
“Ita atu deskobre ida-ne’ebé mak kualidade ha’u bele hateten de’it valór akreditasaun ne’ebé Institutu ensinu superiór públiku no privadu sira hetan mak hatudu ona iha kursu sira balun hetan A balun hetan B no seluk fali hetan C,” nia dehan.
Atu garante kualidade ne’e, nia hateten, kada tinan ANAAA prevee orsamentu atu ajuda universidade sira atu bele avansa ba akreditasaun, nos hosi akreditasaun mak foin bele haree sira-nia klasifikasaun tama iha ne’ebé depois mak ANAAA sei aprezenta dadus.
Iha tinan kotuk, tuir nia, universidade ne’ebé hetan klasifikasaun A iha IESPP haat de’it mak hanesan UNTL, DIT, IOB no ISJB, restu ne’e hetan klasifikasaun B hotu ne’e tanba kursu mak barak liu.
Notísia Relevante: ANAAA halo avaliasaun atu hadi’a kursu no instituisaun sira
Jornalista : Tomé Amado
Editór : Cancio Ximenes
