DILI, 26 jullu 2023 (TATOLI)—Emprezária nasionál, Marlinda de Jesus Barros ‘Lili’, hato’o parabéns ba Agência Noticiosa de Timor-Leste-TATOLI, Institutu Públiku (Agência Tatoli, I.P) ba ezisténsia iha tinan-hitu ne’e no dejeza kontinua servisu ho profisionál hodi hato’o notísia ba públiku, liu-liu tau importánsia ba feto ho atividade negósiu.
“Hakarak hato’o parabéns ba mídia Tatoli, ba ninia aniversáriu ba dala-hitu. Husu liu-liu atu Tatoli bele fó espasu boot liután ba atividade feto sira nian hanesan negósiu ne’ebé sira halo tanba sira mós fó servisu ba sira-nia feto maluk, ida-ne’e presiza tebes apoia hotu-hotu nian, liu-liu mídia,” Lili hateten ba Agência Tatoli iha estúdiu Tatoli, Farol, foin lalais.
Notísia relevante : MAPKOMS sei asina kontratu ho empreza konstrui edifísiu TATOLI, I.P-RTTL, E.P
Na’in ba empreza Matrrozec Gares Unip Lda ne’e konsidera, mídia nu’udar pilár importante ba dezenvolvimentu nasaun. Tanba ne’e nu’udar sidadaun no empreendedora ida, iha esperansa atu Agência Tatoli bele hala’o ninia knaar ho independente no bele hato’o informasaun edukativu ba públiku, no sai mós mídia ne’ebé maka bele harii unidade nasionál, no haburas demokrasia.
“Nu’udar feto, ha’u agradese tebes tanba dala barak ona Tatoli hala’o entrevista hodi fó espasu ba ami empreendedora sira, ba ha’u pesoalmente agradese ba ida-ne’e, ami-nia espetativa ba oin katak Tatoli sai hanesan mídia Estadu ida ne’ebé sai nu’udar fonte informasaun ofisiál hodi fó sai notísia loloos ba públiku, liu-liu kontinua promove empreendedora sira,” nia tenik.
Kriasaun Agência Tatoli bazeia ba dekretu-lei númeru 21/2017, 24 maiu, hanesan ema koletiva ne’ebé iha direitu públiku ho natureza institutu públiku.
Ajénsia Estadu ne’e hetan aprovasaun iha reuniaun Konsellu Ministru no públika iha Jornál Repúblika iha loron 14 marsu 2016, nu’udar embriaun ho naran ANTIL ne’ebé lansa iha 27 jullu 2016.
Ezisténsia Agência Tatoli mak sai fontes informasaun ofisiál Estadu Timor-Leste ne’ebé iha kapasidade no kbiit elabora informasaun ba públiku iha eskala nasionál, rejionál no internasionál.
Jornalista : Antónia Gusmão
Editora : Julia Chatarina
