Top

PM Portugál kompromitidu iha adidu edukasaun tau matan ba estudante timoroan

Primeiru-Ministru Portugál, António Costa, akompaña hosi Prezidente Parlamentu Nasionál, Maria Fernanda Lay, vizita sala Plenaria Parlamentu Nasionál, kuarta (26 jullu 2023). Imajen Tatoli/Francisco Sony.

DILI, 26 jullu 2023 (TATOLI)—Primeiru-Ministru (PM) Portugál, Antonio Costa, kuarta ne’e, hala’o vizita ba iha Parlamentu Nasionál (PN) hodi hasoru malu ho Prezidente Parlamentu Nasionál, Maria Fernanda Lay.

Notísia Relevante: PR Horta-PM Portugál diskute oportunidade merkadu ASEAN

Prezidente Parlamentu Nasionál (PPN), Maria Fernanda Lay, hateten Xefe Governu Portugál kompromete katak iha adidu edukasaun atu fó apoiu ba joven timoron sira-ne’ebé eskola no servisu iha Portugál.

“Hanesan nia (PM Portugál) hato’o sei iha adidu edukasaun, nune’e fó apoiu ba ita-nia joven sira -ne’ebé ba eskola, agora iha ema kuaze 70 posivelmete sei aumenta,” Prezidente Parlamentu Nasionál (PPN), Maria Fernanda Lay, hateten ba jornalista sira hafoin simu vizita hosi Primeiru-Ministru Portugál, António Costa, ho delegasaun iha PN.

Nune’e mós, traballadór timoroan sira-ne’ebé durante ne’e joven sira ba buka servisu iha Europa sira-ne’ebé abandona iha Portugál no daudaun ne’e Governu Portugál tau matan hela.

“Ida-ne’e, ha’u agradese, loloos iha futuru sei iha formasaun ba ita-nia traballadór sira nune’e hetan kampu traballu,” nia hateten.

Prezidente PN ne’e hateten, kona-ba akordu mobilidade entre Timor-Leste ho Portugál horikalan iha sesaun jantar konfraternizasaun iha Palásiu Nobre Lahane, PM Portugál hato’o ona.

“Horikalan ko’alia iha Palásiu Nobre, maibé ita sei problema balun liga ho país CPLP ne’ebé ita ba mós sei aplay liuhosi visa. Tuir loloos ho mobilidade, maibé sira Portugál iha atensaun importante tanbasá, tanba sira mak simu ema barak liu mai hosi pais Afrikanu no mós Timor-Leste,” nia dehan.

Tambá ne’e, Governu ho Governu tenke ko’alia didi’ak hodi labele hasa’e fali númeru dezempregu iha Portugál.

Entretantu, iha soru muru ne’e, Preizdente Parlamentu Nasionál, Maria Fernanda Lay, hato’o agradesimentu ba Primeiru-Ministru Portugál ba kooperasaun di’ak entre Portugál no Timor-Leste durante ne’e.

“Ohin, mai vizita kortezia ne’ebé ami hato’o de’it agradesimentu durante ne’e Portugál iha kooperasaun di’ak ho ita dezde antes independénsia. Depois, to’o hetan independénsia no ate agora, ita iha kooperasaun área oioin no ita husu iha kontinuidade nafatin no amizade entre povu rai rua mantein ba oin nafatin,” nia dehan.

Nia hatutan, durante vizita kortezia ne’e Xefe Governu Portugál ho nia parte la diskute matéria espesífiku ruma tanba kestaun tempu, nune’e parte Parlamentu Nasionál hato’o de’it agradesementu.

Jornalista : Nelson de Sousa

Editór       : Cancio Ximenes

Publisidade

Leave a Reply

Latest Post

error: Content is protected !!