iklan

EKONOMIA, INKLUZAUN SOSIÁL, MUNISÍPIU, VIQUEQUE

SEI husu feto Viqueque envolve iha vida ekonomia

SEI husu feto Viqueque envolve iha vida ekonomia

Atividade formasaun ba grupu feto no vulnerável iha salaun Administrasaun munisípiu Viqueque, kuarta (26/07/2023). Imajen Tatoli/Vitorino Lopes da Costa

VIQUEQUE, 25 jullu 2023 (TATOLI)Reprezentante Sekretaria Estadu Iguldade (SEI),  Carla Maria Valente, husu feto munisípiu Viqueque envolve iha vida ekonomia.

“Ha’u husu feto sira hakbiit empoderamentu ekonomia hodi redús violénsia iha família uma-laran. Tanba ne’e presiza feto hotu-hotu ninia partisipasaun iha vida ekonomia, tanba dala barak problema violénsia la mai hosi buat seluk, maibé nesesidade uma-laran,” Carla Maria Valente, hateten hafoin ramata formasaun ba grupu feto no vulnerável sira, iha salaun Administrasaun munisípiu Viqueque, kuarta ne’e.

Notísia relevante : SEII foku ba empoderamentu feto iha Timor-Leste

SEI realiza formasaun ba grupu feto no vulnerável durante loron-ida, ne’ebé hetan partisipa hosi grupu hitu.

Kona-ba hakbiit feto, iha tinan 2022 SEI aloka ona orsamentu liuhosi verba tranferénsia públika  ho montante millaun $2 ba munisípiu hotu hodi apoia grupu feto no vulnerável sira, ne’ebé iha mós fundu rotativa, nune’e grupu ida ne’ebé hetan fundu ne’e bele halo atividade negósiu no bainhira susesu maka osan inan entrega fali ba grupu seluk hodi hala’o negósiu.

“Fundu ne’ebé SEI aloka ba grupu sira bazeia ba sira-nia proposta atividade negósiu henesan hakiak animál, loke kioske no seluk tan. Ami haree grupu barak maka susesu ona no fó duni benefísiu ba feto sira. Ho fundu ne’e maka ami ohin fó kapasitasaun ba ita-nia grupu benefisiáriu hodi hasa’e koñesimentu hodi jere osan sira-ne’e bele sai di’ak liután,” nia akresenta.

Tuir dadus hosi SEI, sausaun eziste grupu feto no vulnerável hamutuk 28 iha munisípiu Viqueque, ne’ebé sai ona benefisiáriu ba fundu rotativu hahú tinan 2021-2023, enkuntu hosi fundu rotativa ne’e grupu sira hala’o atividade negósiu hanesan hakiak animál, loke negósiu hanesan kioke no grupu tolu maka konsege ona entrega fali fundu rotativa ne’ebé antes ne’e simu hamutuk $2.000 hodi uza halo negósiu.

Jornalista     : Vitorino Lopes da Costa

Editora          : Julia Chatarina

iklan
iklan

Leave a Reply

iklan
error: Content is protected !!