Prezidente Autoridade RAEOA enkoraja TATOLI eduka povu ho informasaun kredivel
OÉ-CUSSE, 27 jullu 2023 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, enkoraja mídia estatál Agência Noticioza Timor-Leste, Institutu Públiku (TATOLI,IP) atu kontinua eduka povu liuhosi fó informasaun kredivel hodi serbí ba ema hotu.
Notísia relevante: Agência TATOLI Sai Ezemplár ba Mídia Seluk
Prezidente Autoridade, RAEOA fó parabéns ba loron universáriu Agência TATOLI,IP ba dala hitu (7) ne’ebé akontese iha loron 27 fulan-jullu 2023 ne’e, nia husu atu kontinua servisu no kontribui prosesu dezenvolvimentu iha Timor-Leste.
“Ha’u só observa ida RAEOA ninian, ha’u kontente ho TATOLI iha RAEOA, tanba TATOLI RAEOA halo kobertura notísia barak, mídia barak la konsege halo, iha tinan hirak kuandu TATOLI hamriik ona, ha’u só ko’alia de’it ba RAEOA, TATOLI halo ona kontribuisaun maka’as ba informasaun barak, ne’ebé RAEOA la konsege hasai ho nia meiu rasik, TATOLI ajuda fó sai, to’o notísia balu RAEOA nian to’o iha rai liur, ne’e ami kontente,” Arsénio Paixão Bano, ba TATOLI iha Oé-Cusse, segunda ne’e.
“Ha’u hanoin atu fó parabens ba Agência TATOLI, kontinua bom traballu serbí Timor-Leste no serbí RAEOA ho fó informasaun loloos kredivel ba populasaun no eduka populasaun ho informasaun ida-ne’ebé mak pozitivu ba ita-nia rai no kontinua ba oin,” nia apela.
Notísia relevante: TATOLI Hahú Sai Referénsia ba Mídia Nasionál no Estranjeiru
Jornalista: Abílio Elo Nini
Editór: Evaristo Soares Martins
