VIQUEQUE, 27 jullu 2023 (TATOLI)–Organizasaun Rais Hadomi Timo-Oan (RHTO) apoia ona fundu ba grupu rua ne’ebé harii hosi ema ho defisiente hodi hala’o atividade negósiu.
“Durante ne’e ami-nia organizasaun oferese ona fundu hodi ajuda maluk defisiente sira hodi hala’o sira-nia atividade negósiu. Grupu rua ne’e hahú hala’o atividade desde tinan 2018, nune’e misaun lepra no RHTO maka fó apoia fundu, kada grupu hetan $500 hodi jere,” Ofisiál RHTO munisípiu Viqueque, Natalino Pinto, informa ba Agência Tatoli, iha postu Viqueque Vila, kinta ne’e.
Grupu rua ne’e maka hanesan grupu La’o Nei-Neik no Fatuk Ruin, ne’ebé hala’o atividade hanesan haki’ak manu, loke kioske kiik no rai osan hodi fó impresta ba ema seluk ne’ebé presiza, hafoin hatama filafali ninian funan ba grupu.
“Ha’u haree progresu atividade sira hosi grupu rua di’ak, tanba uluk ita haree sira loke kioske kiik, maibé agora kioske komesa boot, sira-nia osan ne’ebé rai boot ona no sira fó empresta mós ba abitante sira iha munisípiu Viqueque,” nia akresenta.
Notísia relevante : RHTO-WVTL realiza formasaun defisiénsia jéneru ba joven Vemasse
RTHO halo monitorizasaun ba atividade grupu sira ne’ebé hetan ona apoia orsamentu nune’e bele motiva hodi hetan progresu di’ak.
“Agora ami kontinua akompaña sira liuhosi advokasia, oinsá grupu sira-nia atividade bele moris nafatin. Tanba iha munisípiu Viqueque ema ho defisiente grupu ne’e maka kria ona atividade negósiu hodi hakbiit sira-nia ekonomia uma-laran atu sira labele dependénsia ba ema seluk,” Ofisiál RTHO tenik.
Aleinde ne’e, organizasaun ne’e sei kontinua motiva ema ho defisiente sira seluk ne’ebé seidauk kria negósiu hodi fó apoia fundu hala’o atividade negósiu iha munisípiu Viqueque.
“Ami sei fó nafatin hanoin ba ami-nia maluk defisiente sira oinsá bele fó oportunidade ba sira ne’ebé iha abilidade hodi bele hala’o sira-nia moris. Ami mós sei serbisu hamutuk ho Governu atu fó oportunidade ba ita-nia maluk sira,” nia tenik.
Dezafiu ne’ebé ema ho defisiente sira enfreta maka jeográfika tanba balun hela liu iha área rurál, tanba ne’e menus infomasaun.
“To’o agora foin grupu rua maka hala’o atividade negósiu, maibé parte RHTO sei serbisu hamutuk ho autoridade suku sira atubele transmite informasaun ba sira atu sira bele prepara tuir abilidade ida-idak nian,” nia dehan.
Grupu La’o Nei-neik ho ninia membru na’in-sia no grupu Fatu Ruin ho membru na’in-sia, ne’ebé sede grupu rua ne’e lokaliza iha suku Uma Uain Kraik, postu administrativu Viqueque Vila.
Jornalista : Vitorino Lopes da Costa
Editora : Julia Chatarina
